ডিজিটেল ডেস্কঃ সৌসিদিনা মধ্যপ্ৰদেশৰ এটা মন্দিৰৰ কুৱাৰ ছাদ খহি ৩৬ জন লোকৰ মৃত্যু ঘটাৰ উত্তেজনা মাৰ নৌযাওঁতেই এইবাৰ তামিলনাডুত একেধৰণৰ কৰুণ ঘটনা সংঘটিত হৈছিল। বুধবাৰে চেন্নাইৰ এটা মন্দিৰৰ কাষত থকা পানীৰ টেংকিত পাঁচজন লোক ডুব যায়।
মন্দিৰত পূজা কৰিবলৈ যোৱাৰ সময়তে দুৰ্ঘটনাটো সংঘটিত হয়। খবৰ পোৱাৰ লগে লগে আৰক্ষী আৰু অগ্নি নিৰ্বাপক বাহিনীৰ কৰ্মীসকল ঘটনাস্থলীত উপস্থিত হয়। এতিয়ালৈকে পানীৰ টেংকিৰ পৰা পাঁচজন লোকৰ মৃতদেহ উদ্ধাৰ কৰা হৈছে। আৰক্ষীয়ে মৃতদেহ কেইটা মৰণোত্তৰ পৰীক্ষাৰ বাবে প্ৰেৰণ কৰিছে । দুৰ্ঘটনাটো কিদৰে সংঘটিত হ’ল সেই বিষয়ত আৰক্ষীয়ে তদন্ত আৰম্ভ কৰিছে। মৃত্যু ঘটা লোকৰ সংখ্যা আৰু বৃদ্ধি পাব পাৰে বুলি আশংকা কৰা হৈছে।
নাংগানাল্লুৰৰ ধৰ্মলিঙ্গেশ্বৰ মন্দিৰত ভক্তসকলে 'পাঙ্গুনি' উদযাপন কৰিবলৈ মন্দিৰৰ কাষৰ এটা পানীৰ টেংকৰ ওচৰত সমবেতহৈছিল। চেন্নাই আৰক্ষীৰ সূত্ৰই প্ৰকাশ কৰা অনুসৰি বহুতে শৰীৰৰ ভাৰসাম্য ৰক্ষা কৰিব নোৱাৰি টেংকিটোত পৰি যায়। আন বহুতেও পানীত পৰাসকলক বচাবলৈ টেংকিটোত জাঁপ দিয়ে। তেওঁলোকো গভীৰ পানীত ডুব যায়।
পানীৰ তলত অধিক মৃতদেহ থকাৰ আশংকা কৰি আৰক্ষী আৰু অগ্নিনিৰ্বাপক বাহিনীয়ে ডুবাৰুৰ সহায় লৈছে। তামিলনাডুগ্ৰাম্য উদ্যোগ মন্ত্ৰী টি এম আনবাৰাচানে ঘটনাস্থলী পৰিদৰ্শন কৰি উদ্ধাৰ কাৰ্যৰ বুজ লৈছে। তেওঁ কয়, "যদি আৰক্ষীয়ে তেওঁলোকক নিৰ্দিষ্ট ৰীতি-নীতিৰ (পাঙ্গুনি) বিষয়ে আগতীয়াকৈ অৱগত কৰিলেহেঁতেন তেন্তে এই শোকাৱহ দুৰ্ঘটনাটো এৰাই চলিব পৰা গ’লহেঁতেন।"
Continue Reading
