এইবাৰ এখন চিঠিয়ে মাতিছে বিপদ, ধাতুৰ বাকচত আক্ৰান্তক বন্দী কৰিও তত্‍ পোৱা নাই চীনে

বেইজিং: কৰ’নাৰ বিৰুদ্ধে 'শূন্য সহনশীল' নীতি গ্ৰহণ কৰিছে চীনে । কেনেবাকৈ এজন ব্যক্তিও যদি কৰ’নাত আক্ৰান্ত হোৱাৰ খবৰ পাইছে তেতিয়াও প্ৰশাসনে কঠোৰ ব্যৱস্থা গ্ৰহণ কৰা দেখিবলৈ পোৱা গৈছে। কৰ’নাক্ৰান্ত ব্যক্তিক ধাতুৰ বাকচত বন্দী কৰি এইবিধ মহামাৰীক ৰুধিবলৈ নানা কাৰ্যপন্থা হাতত লোৱা তথ্য ইতিমধ্যে পোহৰলৈ আহিছে। প্ৰশাসনে চীনৰ ৰাজধানী বেইজিঙত এজন ব্যক্তিৰ দেহত অ’মিক্ৰনৰ উপস্থিতিৰ সম্ভেদ পোৱাৰ পাছতে তদন্ত আৰম্ভ কৰিছিল। শেহতীয়াকৈ, কানাডাৰ পৰা অহা চিঠিবোৰে কৰ’না সংক্ৰমণ বৃদ্ধি কৰা বুলি দাবী কৰিছে বেইজিঙে। তেওঁলোকৰ দাবী অনুসৰি, ৭ জানুৱাৰীত কানাডাৰ পৰা এখন চিঠিত পাইছিল কৰ’না। চিঠিখনৰ পৰাই সংক্ৰমণ বিয়পি পৰিছে। বেইজিঙৰ ৰোগ প্ৰতিৰোধ আৰু নিয়ন্ত্ৰণ কেন্দ্ৰৰ উপ-সঞ্চালক পাং শিংহুয়োৱে কয়, ‘কৰ্মক্ষেত্ৰত আক্ৰান্ত ব্যক্তিগৰাকীলৈ প্ৰায়ে বিদেশৰ পৰা চিঠি আহে। পত্ৰখনৰ সংস্পৰ্শলৈ অহা সকলো কৰ্মচাৰী এতিয়া কোৱাৰেণ্টাইনত আছে। অৱশ্যে, চিকিৎসক আৰু অন্যান্য স্বাস্থ্য বিশেষজ্ঞসকলৰ মতে চিঠিৰ পৰা কৰ’না মহামাৰী বিয়পি পৰা ঘটনা বিৰল। চিঠিৰ দৰে নিষ্প্ৰাণ বস্তু এটাত ভাইৰাছ এটা বৰ বেছি দিন জীয়াই থাকিব নোৱাৰে। পৃথিৱীৰ বহু শীৰ্ষ চিকিৎসক আৰু বিশেষজ্ঞৰ দলে এনেদৰে সংক্ৰমণ বিয়পা কথাটো সহজে গ্ৰহণ কৰিব পৰা নাই। তথাপি, কঠোৰ চীন। সাৱধানতাৰ ক্ষেত্ৰত কোনো ধৰণৰ সুৰুঙা ৰাখিব বিচৰা নাই চীনে। সেয়েহে, বাহিৰৰ পৰা অহা যিকোনো সামগ্ৰী গ্ৰহণৰ পূৰ্বে হেণ্ড গ্ল’ভছ আৰু চেনিটাইজাৰ ব্যৱহাৰ কৰাৰ পৰামৰ্শ দিছে চীনা নাগৰিকক।