এইবাৰ ইছলামাবাদতো চলিব সান্ধ্য আৰতি, বাজিব মন্দিৰৰ ঘণ্টাধ্বনি

ইছলামবাদ : পাকিস্তানৰ ৰাজধানী ইছলামাবাদতো এতিয়া চলিব সান্ধ্য আৰতি। পুৱা গধূলি বাজিব মন্দিৰৰ ঘণ্টাধ্বনি। ইছলামিক দেশৰ ৰাজধানীত প্ৰথমটো মন্দিৰ নিৰ্মাণৰ বাট এতিয়া মুকলি হৈছে। অচিৰেই গঢ়ি উঠিব হিন্দু মন্দিৰ! ইছলামবাদ চহৰৰ কৰ্তৃপক্ষই প্ৰথমবাৰৰ বাবে পাকিস্তানৰ ৰাজধানী চহৰখনত হিন্দু মন্দিৰ নিৰ্মাণৰ বাবে অনুমতি দিয়ে৷ চহৰখনত বহুদিন পূৰ্বে হিন্দু ধৰ্মৰ লোকৰ বাবে ভূমি আৱণ্টন সন্দৰ্ভত গোচৰ চলি আছিল৷ সেই গোচৰৰ ৰায়ৰ আধাৰতে চহৰখনত মন্দিৰ নিৰ্মাণৰ বাট মুকলি হৈছে৷

উল্লেখ্য যে, ২০১৬ চনতে ইছলামবাদত ০.৫ একৰ ভূমি হিন্দু সম্প্ৰদায়ৰ বাবে দিয়াৰ কথা আছিল৷ য’ত হিন্দু ধৰ্মাৱলম্বী লোকসকলে এটা মন্দিৰ, এখন শ্মশান ঘাট আৰু ৰাজহুৱা কেন্দ্ৰ গঢ়ি তোলাৰ সিদ্ধান্ত লৈছিল৷ বহু দীঘলীয়া বিতৰ্ক তথা আলোচনাৰ পাছত সোমবাৰে এই ভূমি হিন্দু সম্প্ৰদায়ৰ লোকৰ বাবে আবণ্টন কৰি দিয়া হয়। পূৰ্বে মন্দিৰ নিৰ্মাণৰ কাম আৰম্ভ হৈছিল যদিও আধাতে বন্ধ কৰি দিয়া হৈছিল নিৰ্মাণ কাৰ্য।

এই শুনানিৰ পাছতে পূৰ্বে সেই স্থানত চৰকাৰৰ সিদ্ধান্তৰ ভুল বুজাবুজিৰ বাবে মন্দিৰ নিৰ্মাণ হোৱা নাছিল বুলি জানিবলৈ দিয়ে ৰাজধানী উন্নয়ন কৰ্তৃপক্ষৰ মুখপাত্ৰ চৈয়দ আছিফ ৰাজাই৷ বিগত বছৰৰ জুলাই মাহত ইছলামিক চৰকাৰে মন্দিৰ নিৰ্মাণক লৈ সমালোচনা কৰাৰ বাবে ৰাজধানী উন্নয়ন কৰ্তৃপক্ষই বন্ধ কৰি দিছিল মন্দিৰ নিৰ্মাণৰ কাম৷