এইবাৰ লক্ষ্য হাৰিয়ানা, কুৰুক্ষেত্ৰৰ জনসভাত বিজেপিক তীব্ৰ সমালোচনা অৰবিন্দ কেজৰিৱালৰ

ডিজিটেল ডেস্ক : এইবাৰ লক্ষ্য হাৰিয়ানা। পঞ্জাব দখলৰ পাছত আম আদমী পাৰ্টীয়ে দৃষ্টি দিছে হাৰিয়ানালৈ। হাৰিয়ানত খোপনি পোতাৰ বাবে আম আদমী পাৰ্টীৰ মুৰব্বী অৰবিন্দ কেজৰিৱালে ব্যাপক তৎপৰতা আৰম্ভ কৰিছে। আম আদমী পাৰ্টীৰ আহ্বায়ক আৰু দিল্লীৰ মুখ্যমন্ত্ৰী অৰবিন্দ কেজৰিৱাল দেওবাৰে হাৰিয়ানাৰ কুৰুক্ষেত্ৰত উপস্থিত হয়। কুৰুক্ষেত্ৰত এখন ৰাজহুৱা সভা সম্বোধন কৰে কেজৰিৱালে। সভাখনত ভাষণ প্ৰদান কৰি বিজেপিক তীব্ৰ আক্ৰমণ কৰে কেজৰিৱালে।

অৰবিন্দ কেজৰিৱালে 'ভাৰত মাতা কী জয়' শ্লোগানেৰে আৰম্ভ কৰে নিজৰ ভাষণ৷ মুখ্যমন্ত্ৰী কেজৰিৱালে কয়, ‘যেতিয়া মানুহে মোক হাৰিয়ানাৰ লাল বুলি কয় তেতিয়া মই ইয়াক আটাইতকৈ বেছি ভাল পাওঁ। হাৰিয়ানা মোৰ জন্মভূমি আৰু এই ঠাইৰ মৰম এগৰাকী মাতৃৰ দৰে।’ তেওঁ কয় যে ৭টা জন্মতো মাতৃ আৰু জন্মভূমিৰ ঋণ পৰিশোধ কৰিব নোৱাৰি। তেওঁ কয় যে হাৰিয়ানাত ডাঙৰ ধুমুহা অহাৰ উপক্ৰম ঘটিছে। তেওঁ আৰু কৈছিল যে, যেতিয়া ওপৰৰ জনে ঝাড়ু চলায়, ধুমুহা আহে।’

দিল্লীৰ মুখ্যমন্ত্ৰী তথা আম আদমী পাৰ্টীৰ ৰাষ্ট্ৰীয় সমন্বয়কগৰাকীয়ে লগতে কয় যে তেওঁ হাৰিয়ানাৰ সকলো কৃষকক ধন্যবাদ আৰু অভিনন্দন জনাব বিচাৰে। হাৰিয়ানা আৰু পঞ্জাবৰ কৃষকসকলে যিদৰে এনে এখন অহংকাৰী চৰকাৰক মূৰ দোৱাবলৈ বাধ্য কৰি তুলিলে। তাৰ বাবে লাগিলে এবছৰ আন্দোলন কৰাৰ প্ৰয়োজন নহওক কিয়। এবছৰ ধৰি তেওঁলোকে সিংঘু সীমান্তত অৱস্থান গ্ৰহণ কৰি থাকিল। অৱশেষত, চৰকাৰে তিনিখনৈ বিতৰ্কিত আইন প্ৰত্যাহাৰ কৰিবলৈ বাধ্য হৈ পৰিল। তেওঁ লগতে কয় যে, ৰাৱণৰ অহংকাৰো শেষলৈ টিকি থকা নাছিস। তেওঁ কয় যে ত্ৰেতা যুগত ভগৱান ৰামে ৰাৱণৰ অহংকাৰৰ পতন ঘটাইছিল, কলিয়ুগত কৃষকসকলে বিজেপিৰ অহংকাৰৰ পতন ঘটাইছে।