ডিজিটেল ডেস্কঃ দেশত শেহতীয়াকৈ ৰে’ল দুৰ্ঘটনাৰ সংখ্যা বৃদ্ধি পাইছে৷ ওড়িশাত কেইবা খনো ৰে’ল দুৰ্ঘটনাত পৰিত হোৱাৰ পিছত এইবাৰ মধ্যপ্ৰদেশত সংঘটিত হৈছে আন এক ৰে’ল দুৰ্ঘটনা৷ মধ্যপ্ৰদেশৰ জবলপুৰৰ শ্বাহপুৰা ভিটনিত এখন মালবাহী ৰে'লৰ এলপিজি ৰেকৰ দুটা ৱাগন লাইনচ্যুত হৈছে৷
ৰে'লৱে বিষয়াসকলে বুধবাৰে প্ৰকাশ কৰা মতে এই ঘটনাত কোনো লোক হতাহত হোৱা নাই৷ পশ্চিম মধ্য ৰে'লৱেৰ চিপিআৰঅ'ৰ মতে মালবাহী ৰে'লখন আনলোডিঙৰ বাবে ৰখাৰ সময়তে হচাতে লাইনচ্যুত হৈ পৰে৷ বিষয়াজনে কয় " যোৱা নিশা আনলোডিঙৰ বাবে ৰখাৰ সময়তে এখন মালবাহী ৰে’লৰ এলপিজি ৰেকৰ দুটা ৱাগন লাইনচ্যুত হয়। ইয়াৰ ফলত অৱশ্যে ৰে’লৰ চলাচল প্ৰভাৱান্বিত হোৱা নাই। মুখ্য লাইনত ৰেলৰ চলাচল স্বাভাৱিক হৈয়েই আছে। চাইডিং কৰ্তৃপক্ষৰ উপস্থিতিত পুৱা লাইন মেৰামতিৰ কাম আৰম্ভ হৈছে"।
উল্লেখ্য ২ জুনত ওড়িশাৰ বালাচৰত তিনিখন ৰে'লৰ সংঘৰ্ষত কমেও ২৮৮ জন লোকৰ মৃত্যু হৈছিল আৰু ১০০০ ৰো অধিক লোক আহত হৈছিল। দুৰ্ঘটনাটোৰ প্ৰাথমিক প্ৰতিবেদনত কোৱা হৈছে যে দুৰ্ঘটনাটোত বাংগালুৰু-হাওৰা চুপাৰফাষ্ট এক্সপ্ৰেছ, কৰমণ্ডেল এক্সপ্ৰেছ আৰু এখন মালগাড়ী ক্ষতিগ্ৰস্ত হৈছে৷ দুৰ্ঘটনাটোত দুখন যাত্ৰীবাহী ৰেলৰ প্ৰায় ১৭ টা ডবা লাইনচ্যুত হৈছিল ৷
Continue Reading
