ডিজিটেল ডেস্কঃ ভাৰততো ত্ৰাসৰ সৃষ্টি কৰিছে এবিধ ' মগজু খোৱা' এমিবাই৷ শেহতীয়াকৈ কেৰালাৰ আলাপুঝা জিলাত এজন দশম শ্ৰেণীৰ ছাত্ৰৰ শৰীৰত "মগজু খোৱা " এমিবা নেগলাৰিয়া ফাউলাৰিয়ে প্ৰৱেশ কৰাৰ পিছত তেওঁ প্ৰাণ হেৰুৱায়৷দেওবাৰৰ পৰা চিকিৎসালয়ত ভৰ্তি হৈ থকা কিশোৰজনে শুক্ৰবাৰে শেষ নিশ্বাস ত্যাগ কৰে।
মৃত ছাত্ৰ জনৰ নাম গুৰুদাথ (১৫)৷ তেওঁ আলাপুঝাৰ পুচাক্কালৰ বালিন্দা শালিনী আৰু অনিল কুমাৰৰ পুত্ৰ৷ স্থানীয় পুখুৰী এটাত সাঁতুৰিবলৈ যোৱাৰ সময়তে তেওঁৰ দেহত নাকেৰে মগজু খোৱা এমিবাই প্ৰৱেশ কৰে বুলি ধাৰণা কৰা হৈছে।
নেগলাৰিয়া হৈছে এক মুক্ত-জীৱিত এমিবা - ই এক এককোষী জীৱ। ই সাধাৰণতে গৰম মিঠা পানী (যেনে হ্ৰদ, নদী, আৰু গৰম প্ৰস্ৰৱণ) আৰু মাটিত থাকিব পাৰে ।
এই এমিবাই মানুহৰ মগজুত আক্ৰমণ কৰে৷ মগজুত আক্ৰমণ কৰি বীজাণু বিধে মানুহ এজনক মৃত্যুৰ মুখলৈ ঠেলি দিয়ে৷ বীজাণু বুলি ক’লেও আচলতে ই এক এমিবাহে ৷
শেহতীয়াকৈ দক্ষিণ কোৰিয়াত ধৰা পৰিছে এই এমিবা৷ ইয়াৰ পূৰ্বে আমেৰিকাতো এই এমিবাই ত্ৰাসৰ সৃষ্টি কৰিছিল৷ কিছুদিন পূৰ্বে দক্ষিণ কোৰিয়াত নেগলাৰিয়া ফাউলাৰি বা "মগজু খোৱা এমিবা" নামৰ এমিবা বিধৰ সংক্ৰমণ ধৰা পৰাৰ লগতে এজন লোকৰ মৃত্যুও ঘটিছে৷ । কোৰিয়া ৰোগ নিয়ন্ত্ৰণ আৰু প্ৰতিৰোধ সংস্থাই (কেডিচিএ) নিশ্চিত কৰিছিল যে থাইলেণ্ডৰ পৰা উভতি অহাৰ পিছত মৃত্যু হোৱা এজন কোৰিয়ান নাগৰিক নেগলাৰিয়া ফাউলাৰিৰ দ্বাৰা সংক্ৰমিত হৈ মৃত্যু ঘটিছে।
আচলতে ই এবিধ এমিবা আৰু মানুহৰ মগজুক আক্ৰমণ কৰি ধ্বংস কৰে। পানীৰ জৰিয়তে বিয়পি পৰা এই এমিবাই মগজুত আক্ৰমণ চলায় আৰু মগজুৰ কোষসমূহ কুটি কুটি খাবলৈ আৰম্ভ কৰে।২০২০ চনত আমেৰিকাৰ টেক্সাছৰ লেক জেকচন অঞ্চলৰ পানীৰ টেপ সমূহত বিয়পি পৰিছিল নেগলাৰিয়া ফাউলাৰি নামৰ মাৰাত্মক বেক্টেৰিয়া বিধ।
Continue Reading
