একাদশ শ্ৰেণীৰ ছাত্ৰীৰ সৈতে প্ৰেম কৰি বিয়া ঠিক কৰিলে শিক্ষকে! কিন্তু বিয়াৰ দিনা কইনা নিবলৈ নাহিল শিক্ষক দৰা

কানপুৰত ঘটিছে এই ঘটনা। কানপুৰৰ হনুমন্ত বিহাৰত বাস কৰা এগৰাকী ছাত্ৰীয়ে এখন বিদ্যালয়ত একাদশ শ্ৰেণীত পঢ়ি আছিল। শিৱম দীক্ষিত নামৰ স্কুলৰ শিক্ষক এজনে তাত কোচিং দিবলৈ আহিছিল। এই সময়ছোৱাত শিক্ষক আৰু ছাত্ৰীগৰাকীৰ মাজত প্ৰেমৰ সম্পৰ্ক গঢ়ি উঠে। শিক্ষকে ছাত্ৰীক দিলে বিয়াৰ প্ৰতিশ্ৰুতি। ইয়াৰ পিছত দুয়োৰে পৰিয়ালে একেলগে বিবাহৰ সিদ্ধান্ত লয় আৰু ২৩ এপ্ৰিল মঙলবাৰৰ দিনটো  ঠিক কৰা হয়।

মঙলবাৰে ঘৰতে চলি আছিল বিয়াৰ সম্পূৰ্ণ প্ৰস্তুতি। আলহীসকলো আহি পাইছিল। ৰান্ধনীয়ে খাদ্য ৰান্ধি আছিল। অতিথিসকলে খাইছিলেও কিন্তু এই সময়ছোৱাতে ছোৱালীজনীৰ পৰিয়ালে গম পালে যে দৰাৰ পৰিয়ালে শিৱম দীক্ষিত নিৰুদ্দেশ হোৱা বুলি নৌবাস্তা থানাত ৰিপৰ্ট দাখিল কৰিছে।


কইনাৰ দেউতাকে অভিযোগ  কৰি কয় যে ''পিতৃ মনোজ দীক্ষিতক লগত লৈ শিৱম দীক্ষিতে মোৰ ঘৰলৈ আহি কৈছিল যে ৫ লাখ টকা আৰু দুখন ৱেগনআৰ গাড়ী দিলেহে  আমি বৰযাত্ৰী হৈ আহিম নহ'লে আমি বিয়া নকৰাও। আমি তেওঁলোকক অনুৰোধ কৰিলোঁ যে আমি আপোনালোকক বাইকখন দিছো। লগতে অধিক যৌতুকো দিছো। ইয়াৰ আগতেও আমি আপোনাক ৫ লাখ টকা দিছিলোঁ। কিন্তু তেওঁলোক বিয়াৰ বাবে সাজু নাছিল।''

কইনাৰ পিতৃয়েও  হনুমন্ত বিহাৰ থানাত এজাহাৰ দাখিল কৰে। ছোৱালীজনীৰ পিতৃৰ অভিযোগ যে দৰা শিৱম দীক্ষিতে আন এগৰাকী ছোৱালীৰ সৈতেও ফোনত কথা পাতিছিল। এনে পৰিস্থিতিত সেই ছোৱালীজনীৰ লগত হয়তো শিৱম পলাই যোৱাৰ সম্ভাৱনা আছে।

এই ক্ষেত্ৰত নৌবাষ্টা থানাৰ ভাৰপ্ৰাপ্ত বিষয়া সতীশ কুমাৰ পাণ্ডেই কয় যে পৰিয়ালৰ লোকে শিক্ষক শিৱম দীক্ষিতৰ নিৰুদ্দেশৰ অভিযোগ দাখিল কৰিছে। আনহাতে ছোৱালীজনীৰ পৰিয়ালে দৰাজনে ঠগা বুলি হনুমান বিহাৰ থানাত এজাহাৰ দাখিল কৰিছে। গোচৰটোৰ তদন্ত অব্যাহত আছে।