একেদিনাই ১০টি সন্তান প্ৰসৱ এগৰাকী মহিলাৰ, প্ৰতিৰক্ষা মন্ত্ৰণালয়েও জনালে অভিনন্দন

ডিজিটেল ডেস্কঃ দিনটোৰ আৰম্ভণিৰ পৰাই নানা সংবাদে চুই যায়। এনে বহু আজৱ সংবাদেও হতচকিত কৰি তোলে শ্ৰোতা-দৰ্শকক। শেহতীয়াকৈ তেনে এক বাতৰিয়েই চৰ্চাৰ কেন্দ্ৰবিন্দু হৈ পৰিছে। ইমানেই আজৱ ঘটনা য’ত প্ৰতিৰক্ষা মন্ত্ৰণালয়েও জনালগীয়া হৈছে অভিনন্দন। ঘটনাটো চৌদি আৰৱৰ। চৌদি আৰৱত এগৰাকী মহিলাই একেদিনাই ১০টা সন্তান প্ৰসৱ কৰাৰ খবৰ পোহৰলৈ আহিছে। চলিত বৰ্ষৰ ১২ জানুৱাৰীত ৰাজধানী ৰিয়াধৰ কিং ছলমান সশস্ত্ৰ বাহিনী চিকিৎসালয়তে মহিলাগৰাকীৰ প্ৰসৱৰ বাতৰি শেহতীয়াকৈ চৌদি গেজেটৰ এক প্ৰতিবেদনত প্ৰকাশ পাইছে। প্ৰতিবেদন অনুসৰি, ৩৪ বছৰীয়া মহিলাগৰাকীয়ে একেদিনাই ১০ টা সন্তান জন্ম দিয়ে। প্ৰতিজন শিশুৰে স্বাস্থ্যৰ অৱস্থা বৰ্তমান উন্নত। প্ৰতিটো শিশুৰ ওজন ৯৫০ গ্ৰামৰ পৰা ১,১০০ গ্ৰামৰ ভিতৰত বুলিও সদৰী কৰিছে চিকিত্‍সালয় কৰ্তৃপক্ষই। চৌদি আৰৱৰ প্ৰতিৰক্ষা মন্ত্ৰণালয়ে টুইটাৰত এই বাতৰিটো শ্বেয়াৰ কৰিছে। অৱশ্যে, সেই টুইটাৰ একাউণ্টত বা চৌদি সংবাদ মাধ্যমত নৱজাতকৰ কোনো ছবি প্ৰকাশ কৰা নাই। এই সংবাদ পোহৰলৈ অহাৰ পাছতে সকলোৱে চিকিৎসক সকলক প্ৰশংসা কৰিছিল আৰু নৱজাতক শিশুকেইটিৰ অভিভাৱককো জনাইছে আন্তৰিক শুভকামনা।