এখন নতুন অসমীয়া ছবিত দেখা যাব বলীউদৰ জেষ্ঠ অভিনেতা শৰৎ ছাক্সেনাক ; শীঘ্ৰেই আৰম্ভ হ’ব ছবিখনৰ দৃশ্যগ্ৰহণৰ কাম

শৰৎ ছাক্সেনাই অভিনয় জীৱনৰ পাতনি মেলিছিল ১৯৭০ চনত । হিন্দীৰ লগতে তেলুগু, মালায়ালম আৰু তামিল ভাষাৰ ছবিতো অভিনয় কৰিছে অভিনেতাগৰাকীয়ে । প্ৰথমাৱস্থাত তেওঁ সহ-অভিনেতা হিচাপেই অভিনয় জীৱনৰ আৰম্ভণি ঘটাইছিল ৷

তেওঁ অভিনয় কৰা কেইখনমান উল্লেখনীয় জনপ্ৰিয় ছবি হ’ল ফানা, ক্ৰীছ, ত্ৰিদেৱ, ঘায়েল, খিলাড়ী, গোলাম, গুপ্ত: দ্য হিডেন ট্ৰুথ, ডুপ্লিকেট, ছ’লজাৰ, বাগৱান, মিষ্টাৰ ইণ্ডিয়া, এক হি ৰাস্তা,ফিৰ হেৰাফেৰী,বজৰংগী ভাইজান, আদি । ছবিত অভিনয় কৰাৰ লগতে তেওঁ দূৰদৰ্শনৰ জনপ্ৰিয় ধাৰাবাহিক মহাভাৰততো অভিনয় কৰিছিল অভিনেতাগৰাকীয়ে ।

আহিবলগীয়া নতুন অসমীয়া ছবি ‘মোক্ষ’ত তেওঁ অভিনয় কৰিব এটি বিশেষ চৰিত্ৰত । উল্লেখ্য যে এই ছবিখনৰ মুখ্য চৰিত্ৰটো ৰূপায়ন কৰিব জনপ্ৰিয় অভিনেতা ৰবি শৰ্মাই ৷ সোমবাৰে গুৱাহাটীৰ জ্যোতি চিত্ৰবনত অনুষ্ঠিত হয় আহিবলগীয়া এই নতুন অসমীয়া ছবিখনৰ মহুৰত অনুষ্ঠান । অনুষ্ঠানত উপস্থিত থাকি অভিনেতাগৰাকীয়ে কয়, “ডেৰ হাজাৰ কিলোমিটাৰ দূৰৰ মুম্বাইৰ পৰা মোক আজি ইয়ালৈ মাতি অনাৰ বাবে মই অতি সুখী অনুভৱ কৰিছো । এই সৌভাগ্য সকলোৱে লাভ নকৰে । ঈশ্বৰৰ আশীৰ্বাদত মই এই সৌভাগ্য লাভ কৰিছো । এই ছবিখনত মোৰ চৰিত্ৰটো ইমান ডাঙৰ নহয় যদিও বহুত গুৰুত্বপূৰ্ণ এটা চৰিত্ৰ । যিমানদূৰলৈ মই ছবিখনৰ বিষয়বস্তুৰ বিষয়ে জানিব পাৰিছো, মোৰ ছবিখনৰ বিষয়বস্তু বহুত ভাল লাগিছে । মই আশাবাদী যে দৰ্শকে ছবিখন চাই ভাল পাব । ছবিখনৰ যি কাহিনী সেয়া অতি হৃদয়স্পৰ্শী । ছবিখনত দেশপ্রেম, প্ৰেম আৰু বন্ধুত্বৰ সুন্দৰ উপস্থাপন কৰা হৈছে ৷”