এখন ঐতিহাসিক বাজেট: যিয়ে সলনি কৰিছিল ভাৰতৰ অৰ্থনীতি

ডিজিটেল ডেস্ক: অহা ১ ফেব্ৰুৱাৰীত এই বছৰৰ কেন্দ্ৰীয় বাজেট কেন্দ্ৰীয় বিত্তমন্ত্ৰী নিৰ্মলা সীতাৰমণে সংসদত উত্থাপন কৰিব৷ গতানুগতিকভাৱে প্ৰতিবছৰৰ দৰে, এই বৰ্ষৰ বাজেটেও পৰৱৰ্তী বিত্তীয় বৰ্ষৰ বাবে চৰকাৰৰ অৰ্থনৈতিক নীতি নিৰ্ধাৰণ কৰিব। কিন্তু, ভাৰতৰ সংসদীয় ইতিহাসত কেইগৰাকীমান বিত্তমন্ত্ৰীৰ বাজেটে দেশবাসীৰ মনত গভীৰভাৱে ৰেখাপাত কৰি থৈছে৷ তেনে কেইখনমান বাজেটে নিৰ্ণয় কৰিছিল আধুনিক ভাৰতৰ গতিবিধি তথা উত্তৰনৰ নতুন বাট৷ জন মাথাইৰ পৰা ইন্দিৰা গান্ধী আৰু মনমোহন সিঙলৈকে ভাৰতে কেইবাবাৰো ঐতিহাসিক বাজেটৰ সাক্ষী হৈছে৷ ভাৰতৰ প্ৰথম বাজেট জন মাথাইৰ অধীনত ভাৰত গণৰাজ্যই ১৯৪৮-১৯৪৯ বিত্তীয় বৰ্ষৰ বাবে স্বাধীনোত্তৰ ভাৰতৰ প্ৰথম বাজেট ঘোষণা কৰে আৰু গৃহীত কৰে। প্ৰথম প্ৰধানমন্ত্ৰী জৱাহৰলাল নেহৰুৰ অধীনত স্বাধীন ভাৰতত ঘোষণা কৰা এইখনে প্ৰথম বাজেট আছিল।১৯৫৬ চনত সেই সময়ত ভাৰতৰ বিত্তমন্ত্ৰী টি.টি. কৃষ্ণমাচাৰীয়ে ১৯৫৭-১৯৫৮ বৰ্ষৰ বাজেটত সম্পদ কৰ প্ৰৱৰ্তন কৰিছিল, যি ব্যক্তিগত সম্পত্তিৰ মুঠ মূল্যৰ ওপৰত আৰোপ কৰাৰ নীতি নিৰ্ধাৰণ কৰিছিল৷ ২০১৫ চনলৈ বিলুপ্ত নোহোৱালৈকে ষাঠিৰ দশকৰে সম্পদ কৰ বিভিন্ন ৰূপত অব্যাহত আছিল। ভাৰতৰ প্ৰথমগৰাকী মহিলা বিত্তমন্ত্ৰী তথা ভাৰতৰ প্ৰথমগৰাকী মহিলা প্ৰধানমন্ত্ৰী ইন্দিৰা গান্ধীয়ে মোৰাৰজী দেশাইৰ পদত্যাগৰ পাছত ১৯৭০-১৯৭১ চনত এই পদত অধিষ্ঠিত হৈছিল আৰু ‘গৰীৱি হাটাও’ৰ দৰে শ্ল’গানেৰে তেওঁৰ বাজেট ভাষণ প্ৰদান কৰিছিল। ১৯৯১-১৯৯২ চনৰ মনমোহন সিঙৰ কেন্দ্ৰীয় বাজেটে ভাৰতীয় অৰ্থনীতিৰ চেহেৰা চিৰদিনৰ বাবে সলনি কৰি দিছিল। বাজেটখনে অনুজ্ঞাপত্ৰৰাজৰ সমাপ্তি আৰু ভাৰতীয় অৰ্থনীতিৰ উদাৰীকৰণৰ আৰম্ভণি কৰিছিল। নব্য উদাৰীকৰণ নীতিয়ে পৰৱৰ্তী সময়ৰ ভাৰতবৰ্ষক ক’ৰ পৰা ক’লৈ লৈ গৈছিল, সেয়া সৰ্বজনবিদিত৷ শেহতীয়াকৈ, ২০১৭ চনত তদানীন্তন বিত্তমন্ত্ৰী অৰুণ জেটলীৰ কেন্দ্ৰীয় বাজেট ভাষণে কেন্দ্ৰীয় বাজেটৰ পৰা পৃথক ৰে’ল বাজেট ৰখাৰ ৯২ বছৰীয়া পুৰণি পৰম্পৰাৰ সমাপ্তি ঘটাইছিল৷