ৰে’ল যাত্ৰাত আপোনাৰ আসন আন যাত্ৰীয়ে দখল কৰি অসুবিধা দিছে নেকি? ভাৰতীয় ৰে’লৱেই দিলে সমাধান

কম বেছি পৰিমাণে সকলোৰে  ৰে'লত ভ্ৰমণ কৰাৰ অভিজ্ঞতা আছে৷  এই অভিজ্ঞতাবোৰ বিচিত্ৰ৷ ব্যয় যথেষ্ট সীমিত বাবে বহুতে ৰে'ল যাত্ৰাক পছন্দ কৰে৷ আনহাতে যাত্ৰী অধিক বাবে  ৰে'ল যাত্ৰাত  তুলনামূলকভাৱে সমস্যাও অধিক হয়৷ 

এনে নানান সমস্যাৰ ভিতৰত  যাত্ৰী সকল সন্মুখীন হোৱা এটা প্ৰধান সমস্যা হ’ল-আসন কেন্দ্ৰীক৷  কিন্তু আসনক লৈ ৰে'ল যাত্ৰী সকল আৰু সমস্যাৰ সন্মুখীন নহ’ব৷ ভাৰতীয় ৰে'লৱেয়ে  যাত্ৰী সকলৰ সুবিধাৰ্থে হাতত লৈছে এক বিশেষ পদক্ষেপ৷

দেখা যায় যে পূৰ্বতেই ৰে'লৰ আসন বুক কৰি থোৱাৰ পিছতো আন যাত্ৰীয়ে সেই আসন বলপূৰ্বকভাৱে দখল কৰি থাকে৷ হাজাৰ অনুৰোধৰ পিছতো বুক কৰি থোৱা ব্যক্তিজনক আসন এৰি নিদিয়ে৷ কিন্তু এতিয়াৰ পৰা আৰু কোনো যাত্ৰী তেনে সমস্যাৰ সন্মুখীন হ’ব নালাগে৷ ভাৰতীয় ৰে'লৱেৰ ওচৰত অভিযোগ দাখিল কৰি সহজেই আপুনি  আপোনাৰ আসন খালী কৰিব পাৰিব।

এনেধৰণৰ আসন সম্পৰ্কীয় অভিযোগ দাখিল কৰিবলৈ হ’লে আপুনি প্ৰথমে ৰে'লৱেৰ ৱেবছাইটত ক্লিক কৰিব লাগিব৷ ৰে'লৱেৰ এই ৱেবচাইটটো হৈছে- https://railmadad.indianrailways.gov.in ৷
ৱেবচাইটটো খোলাৰ পিছত আপুনি  ম'বাইল নম্বৰ আৰু আপোনাৰ  বিতং তথ্য দাখিল কৰিব লাগিব৷ তাৰ পিছত আপুনি অ’টিপি প্ৰেৰণ কৰক বুলি উল্লেখ থকা ঠাইত ক্লিক কৰিব লাগিব। ইয়াৰ পিছত  আপুনি  টিকট বুকিংৰ পি এন আৰ নম্বৰ সংলগ্ন কৰিব লাগিব আৰু ইয়াৰ পিছতে  অভিযোগ বাছনি কৰিব পাৰিব। লগতে আপুনি ইয়াত ঘটনাটোৰ তাৰিখ বাছনি কৰিব লাগিব। আপুনি বিচাৰিলে আপোনাৰ অভিযোগটো বিতংভাৱেও লিখিব পাৰে। ইয়াৰ  পিছত চাবমিট বুটামত ক্লিক কৰিলে ভাৰতীয় ৰে'লৱেই সোনকালেই আপোনাৰ সমস্যাৰ  সমাধান কৰিব৷