ডিজিটেল ডেস্ক: আজীৱন ৰাষ্ট্রপতি হৈ থকাৰ নিয়ম প্ৰযোজ্য কৰাৰ পাছতো গাদীচ্যুত হোৱাৰ ভয়ে খেদিছে ৰাছিয়াৰ ৰাষ্ট্রপতি পুটিনক৷ যাৰবাবে পুটিনে এফালৰ পৰা নিঃশেষ কৰি গৈছে এজনৰ পাছত আনজন প্ৰতিদ্বন্দ্বীক৷ শেহতীয়াকৈ অৰ্থাৎ ১৬ ফেব্ৰুৱাৰীত আকস্মিকভাৱে মৃত্যু হৈছিল ৰাষ্ট্রপতি পুটিনৰ ঘোৰ প্ৰতিদ্বন্দ্বী এলেক্সি নভলনিৰ৷
১৬ ফেব্ৰুৱাৰীত বিশ্বৰ অন্যতম ভয়ংকৰ কাৰাগাৰত মৃত্যু হৈছিল এলেক্সিৰ৷ নিজৰ ঘোৰ প্ৰতিদ্বন্দ্বীগৰাকীক বিগত দুটা মাহে পুটিনে বন্দী কৰি ৰাখিছিল আৰ্কটিক অঞ্চলৰ বিশ্বৰ আটাইতকৈ ঠাণ্ডা কাৰাগাৰখনত৷ প’লাৰ বোল্ফ নামৰ কুখ্যাত কাৰাগাৰখনতেই আকস্মিকভাৱে মৃত্যুৰ ঘটনাক সহজভাৱে ল’ব পৰা নাই এলেক্সিৰ সমৰ্থকসকলে৷
যাৰবাবে এতিয়া ৰাছিয়াৰ বিভিন্ন স্থানত প্ৰতিবাদত নামিছে এলেক্সিৰ হাজাৰ হাজৰ সমৰ্থক৷ নেতাগৰাকীক শ্ৰদ্ধাঞ্জলি জনাবলৈ উপস্থিত হোৱা প্ৰায় ৩০০ গৰাকী লোকক গ্ৰেপ্তাৰ কৰিছে ৰাছিয়াৰ আৰক্ষীয়ে৷ ৰাছিয়াৰ ৰাজধানী মস্কো চহৰৰ ওপৰিও দেশখনৰ ১০খন চহৰত ১০০ গৰাকী এলেক্সি সমৰ্থক গ্ৰেপ্তাৰ কৰিছে আৰক্ষীয়ে৷
দৰাচলতে মৃত্যুৰ এদিন পূৰ্বে কাৰাগাৰৰ পৰাই ভিডিঅ’ কনফাৰেন্সিঙৰ জৰিয়তে শুনানিত উপস্থিত আছিল পুটিনবিৰোধী নেতাগৰাকী৷ য’ত যথেষ্ট স্বাভাৱিক অৱস্থাত দেখা গৈছিল এলেক্সি নভলনিক৷ কিন্তু তাৰপাছতেই ৰহস্যজনকভাৱে মৃত্যু ঘটিছিল নভলনিৰ৷ যাৰবাবে এই ঘটনাক এক হত্যাকাণ্ড বুলি অভিহিত কৰিছে এলেক্সিৰ সমৰ্থকসকলে৷
আনহাতে নেতাগৰাকীৰ মৃতদেহ মাতৃক চমজাই দিবলৈও অস্বীকাৰ কৰিছে পুটিন প্ৰশাসনে৷ জাৰ্মানীৰ এক সন্মিলনত উপস্থিত থকা এলেক্সিৰ পত্নীয়ে স্বামীৰ অস্বাভাৱিক মৃত্যুৰ বাবে জগৰীয়া কৰিছে ৰাষ্ট্রপতি পুটিনক৷ আনহাতে বিশ্বজুৰি সৃষ্টি হৈছে প্ৰতিক্ৰিয়াৰ৷
কানাডাৰ প্ৰধানমন্ত্ৰীয়ে এলেক্সিৰ মৃত্যুৰ পাছতে ৰাক্ষস বুলি অভিহিত কৰিছে ৰাষ্ট্রপতি পুটিনক৷ ব্ৰিটেইনে ইতিমধ্যে চমন জাৰি কৰিছে দেশখনত থকা ৰাছিয়াৰ কূটনীতিকক৷ ইউৰোপ আৰু আমেৰিকাত এলেক্সিৰ মৃত্যুক লৈ সাব্যস্ত কৰা হৈছে প্ৰতিবাদ৷
আনহাতে এলেক্সিৰ মৃত্যুক লৈ প্ৰতিক্ৰিয়া প্ৰকাশ কৰিছে মাৰ্কিন ৰাষ্ট্রপতি জ’ বাইডেনেও৷ এলেক্সি নভলনিৰ মৃত্যুৰ ফল বিনাশকাৰী হ’ব বুলি অভিহিত কৰিছে মাৰ্কিন ৰাষ্ট্রপতিগৰাকীয়ে৷ দৰাচলতে ২০২১ চনত ১৯ বছৰৰ কাৰাদণ্ড বিহা হৈছিল পুটিনৰ ঘোৰ বিৰোধী নেতা এলেক্সিক৷ কিন্তু কাৰাগাৰত থকা অৱস্থাতেই এলেক্সি নভলনিয়ে এনেদৰে ৰহস্যজনক মৃত্যুক সাৱটি লোৱা পাছত এতিয়া ৰাছিয়াত জ্বলিছে বিদ্ৰোহৰ অগনি৷
Continue Reading
