ডিজিটেল ডেস্ক: পিতৃৰ বৃত্তিগত পৰিচয়ক লৈ গৰ্বিত তেওঁ৷ জীৱনৰ বাটত পিতৃ-পৰিচয়ে তেওঁক দিছে নতুন গতি৷ কন্যাৰ সফলতাত সুখী পিতৃয়ো৷ উত্তৰ প্ৰদেশৰ এগৰাকী ৰাজমিস্ত্ৰীৰ কন্যাৰ সফলতাই আনন্দৰ জোৱাৰ আনিছে৷ উত্তৰ প্ৰদেশৰ জনপদ মুজাফৰ নগৰৰ এজন ৰাজমিস্ত্ৰীৰ কন্যাৰ সাফল্যই এতিয়া চমকিত কৰিছে সকলোকে৷
নিজৰ তীক্ষ্ণ মেধাৰে ৰাজমিস্ত্ৰীগৰাকীৰ কন্যাই আমেৰিকাৰ প্ৰসিদ্ধ বাবসন কলেজৰ জলপানি লাভ কৰিবলৈ সক্ষম হৈছে৷ এই জলপানি আমেৰিকাৰ উক্ত কলেজখনে উচ্চশিক্ষাৰ বাবে প্ৰদান কৰিছে ৰাজমিস্ত্ৰীগৰাকীৰ কন্যাক৷
ৰাজমিস্ত্ৰীগৰাকীৰ কন্যাৰ নাম মুস্কান আনছাৰী৷ জানিব পৰা মতে, মুস্কানে বুলন্দ চহৰৰ বিদ্যাজ্ঞান বিদ্যালয়ত অধ্যয়ন কৰি আছে৷ ২০১৪ চনত প্ৰৱেশ পৰীক্ষাত উত্তীৰ্ণ হোৱাৰ পিছৰে পৰা মুস্কানে এই বিদ্যালয়ত অধ্যয়ন কৰি আছে৷ এই বিদ্যালয়খনে সমাজৰ অৰ্থনৈতিকভাৱে দুৰ্বল লোকসকলৰ সন্তানৰ শিক্ষাৰ সম্পূৰ্ণ খৰচ বহন কৰে৷
উল্লেখযোগ্য যে, দশম শ্ৰেণীত ৯৭.৬ শতাংশ নম্বৰ লাভ কৰি উত্তীৰ্ণ হৈছিল মুস্কান৷ এই উত্তম নম্বৰৰ বাবে মুস্কান আমেৰিকাৰ বাবসন কলেজলৈ নিৰ্বাচিত হৈছিল৷ এই কলেজেই ১০০ শতাংশ জলপানি প্ৰদান কৰিছে মুস্কানক উচ্চ শিক্ষাৰ বাবে৷
মুস্কানৰ এই সাফল্যই পৰিয়ালৰ লগতে অঞ্চলটোৰ আন লোকসকলকো সুখী কৰি তুলিছে৷
এই সাফল্যৰ বাবে মুস্কানে নিজৰ পৰিয়াল আৰু শিক্ষাগুৰুক ধন্যবাদ জনাইছে৷ অনাগত দিনত দেশৰ হকে কাম কৰি যাবলৈ আগ্ৰহ প্ৰকাশ কৰিছে মুস্কানে৷ তাৰোপৰি মুস্কানে নিজৰ সম্প্ৰদায়ৰ লোকসকলক তেওঁলোকৰ সন্তানক পঢ়ুৱাবলৈ অনুৰোধ জনায়৷
Continue Reading
