ডিজিটেল ডেস্কঃ ছয়জনীয়া এটা দলে ৰেঁস্তোৰালৈ গৈ জোৰদাৰ পাৰ্টি কৰিছিল। তাতে তেওঁলোকে ইটোৰ পাছত সিটো খাদ্যৰ অৰ্ডাৰ দিছিল, সুৰাপান কৰিছিল আৰু বহুত আনন্দ-ফূৰ্তি কৰিছিল। কিন্তু যেতিয়া ২৫ হাজাৰ ৮০২ টকাৰ বিল পৰিশোধ কৰাৰ সময় আহিল, তেতিয়া দলটো ৰেঁস্তোৰাখনৰ পৰা পলাই যায়। পিছফালৰ দুৱাৰেদি দৌৰি যোৱাৰ ভিডিঅ’ পোহৰলৈ আহিছে। এই ভিডিঅ'টো ৰেঁস্তোৰাৰ মালিকে মুকলি কৰিছে।
মালিকে পলাই যোৱা গ্ৰাহকক বিচাৰি উলিওৱাত সহায় কৰিব লাগে বুলি জনসাধাৰণক অনুৰোধ জনাইছে। এই সন্দৰ্ভত আৰক্ষীক অভিযোগ দাখিল কৰিছে ৰেঁস্তোৰাৰ মালিকে। আৰক্ষীয়ে দলটোক বিচাৰি ফুৰিছে।
ব্ৰিটেইনৰ নৰ্থ ইয়ৰ্কশ্বাৰৰ দ্য ছাটন আৰ্মছ ৰেঁস্তোৰাত সংঘটিত হৈছে এই ঘটনা। যাৰ এটা ভিডিঅ’ আগদিনা ছ’চিয়েল মিডিয়াত ভাইৰেল হৈছিল। ভিডিঅ’টো মুকলি কৰা ৰেঁস্তোৰাখনৰ মালিকে জনোৱা মতে, ৬ জনীয়া এটা দলে ৰেঁস্তোৰাখনলৈ আহি খাদ্যৰ বিল নিদিয়াকৈ পলাই যায়।
অৱশ্যে মালিকে তেওঁক ধন দিবলৈ সকীয়াই দিছিল আৰু লগতে কয় যে বিল পৰিশোধ নকৰিলে তেওঁলোকৰ ভিডিঅ’ ৰাজহুৱা কৰা হ’ব। কিন্তু তথাপিও গ্ৰাহককেইজনে তেওঁৰ কথা নুশুনিলে। ইয়াৰ পিছতে ছজনীয়া দলটো গোপনে ৰেঁস্তোৰাখনৰ পৰা পলাই যোৱাৰ চিচিটিভি ফুটেজ মুকলি কৰে মালিকে।
এই ফুটেজত দেখা গৈছে যে কেনেকৈ তিনি-চাৰিজন লোকে পাল পাতি ৰেঁস্তোৰাখনৰ পৰা ওলাই আহিছে। ইয়াৰ ভিতৰত মহিলাও আছে।
মালিকে কয় যে যদিহে ধন নাপায় তেন্তে বাকী ফুটেজ আৰক্ষীক দিয়া হ’ব আৰু ব্যৱস্থা লোৱা হ’ব। বৰ্তমান পলায়ন কৰা গ্ৰাহকৰ সন্ধান চলি আছে।
Continue Reading
