'জিম্মী জিম্মী আজা আজা’! চীনৰ লকডাউনবিৰোধী প্ৰতিবাদত ব্যৱহাৰ হৈছে বাপ্পী লাহিৰীৰ এই ক্লাছিক গানটো

ডিজিটেল ডেস্কঃ বলিউডত এসময়ত ধুমুহাৰ সৃষ্টি কৰা 'জিম্মী জিম্মী আজা আজা’ গানটো মনত আছেনে? বাপ্পী লাহিৰিয়ে সংগীত পৰিচালনা কৰা ১৯৮২ চনৰ 'ডিস্কো ডেন্সাৰ’ৰ সেই গানটো নিশ্চয় শ্ৰোতাৰ কাণত এতিয়াও বাজি থাকে। গানটোত কণ্ঠ নিগৰাইছিল পাৰ্বতী খান আৰু বিজয় বেনেডিক্টে।

'জিম্মী জিম্মী আজা আজা’ এতিয়া কেৱল ভাৰততে নহয়, ভাৰতৰ চুবুৰীয়া চীনতো অশেষ জনপ্ৰিয়তা লাভ কৰিছে। আনকি দেশখনত হোৱা এক প্ৰতিবাদতো গানটো ব্যৱহাৰ হোৱা পৰলক্ষিত হৈছে।

বৰ্তমান ক’ভিড লকডাউনক লৈ চীনত প্ৰতিবাদ চলি আছে। টিকটকৰ যোগেৰে অনেক চীনা নাগৰিকে ক’ভিডক লৈ চৰকাৰৰ শেহতীয়া পদক্ষেপসমূহৰ প্ৰতিবাদ কৰি আহিছে। তেনে এটা প্ৰতিবাদী টিকটক ভিডিঅ’ত বাপ্পী লাহিৰিৰ 'জিম্মী জিম্মী আজা আজা’ ব্যৱহাৰ কৰা দেখা গৈছে।

বাপ্পী লাহিৰিৰ গানটো চীনৰ মান্দাৰিন ভাষাত 'জিয়ে মি জিয়ে মি’ৰ ধৰণে গোৱা হৈছে। চীনা ভাষাত ইয়াৰ অৰ্থ হৈছে 'মোক ভাত দিয়া মোক ভাত দিয়া’। লকডাউনৰ সময়ত দেশখনত দেখা দিয়া  খাদ্যৰ অনাটনকে ইয়াৰ দ্বাৰা প্ৰকাশ কৰা হৈছে। চীনত টিকটককে ধৰি সামাজিক মাধ্যমসমূহক কাড়া নজৰ ৰখা হয়, কিন্তু উক্ত ভিডিঅ’টো ইয়াৰ সাৰি যাবলৈ সক্ষম হয়।

উল্লেখ্য যে চীনত শেহতীয়াকৈ ক’ভিডে পুনৰ প্ৰাদুৰ্ভাৱ ঘটিছে। সেয়ে দেশখনত জিৰ’-কভিড পলিচি লোৱা হৈছে। এই অনুসৰি চাংহাইকে ধৰি কেইবাখনো চহৰত সপ্তাহজুৰি লকডাউন দিয়া হৈছে। সেইবাবেই প্ৰতিবাদী হৈ পৰিছে দেশখনৰ লোকসকল।