ডিজিটেল ডেস্কঃ পুষ্কৰ ৰাজস্থানৰ এখন ঠাই। প্ৰতি বছৰে ইয়াত আন্তঃৰাষ্ট্ৰীয় পশু মেলা অনুষ্ঠিত হয়। এই মেলা সমগ্ৰ দেশতে বিখ্যাত। ইয়াত দেশৰ বিভিন্ন প্ৰান্তৰ পৰা পশুপালকসকলে আহি খেতি বা ব্যক্তিগত কামত জীৱ-জন্তু কিনি বিক্ৰী কৰে। ইয়াৰ উপৰিও বিভিন্ন প্ৰাণীৰ মাজত প্ৰতিযোগিতা দেখা যায়। বহু মালিক ইয়ালৈ জীৱ-জন্তু বিক্ৰীৰ বাবে নহয় কেৱল প্ৰদৰ্শনৰ বাবেও আনে।
এইবাৰ এই মেলাত গুজৰাটৰ এটা ঘোঁৰাই সকলোৰে দৃষ্টি আকৰ্ষণ কৰিছে। ঘোঁৰাটোৰ মূল্য ৭ কোটি টকা। বাপৰে...৭ কোটি টকা! ইমান টকাৰে কি কৰিব পাৰি? ৭ কোটি টকাত শেহতীয়াকৈ মুকলি কৰা বিলাসী গাড়ী ৰ’লছ ৰয়ছ গোষ্ট আহিব। যদি একো নহয়, তেন্তে ১৪ ফৰ্চুনাৰ নিশ্চয় আহিব।
ঘোঁৰাটোৰ নাম ‘ফ্ৰেজেণ্ড’। ফ্ৰেজেণ্ডৰ কথা জানিলে আপুনি স্তম্ভিত হ’ব। এই ঘোঁৰাটোৱে দৈনিক ১৫ লিটাৰ গৰুৰ গাখীৰ খায়। দৈনিক ৫ কেজি বুট আৰু ৫ কেজি দাইল খায়। ই কেৱল মিনাৰেল ৱাটাৰহে খায়, অন্য পানী একেবাৰে নাখায়। ঘোঁৰাৰ স্বত্বাধিকাৰী যুৱৰাজ জাডেজাই কয় যে ফ্ৰেজেণ্ড হৈছে হাইব্ৰিড। পিতৃ ৰাজস্থানী জাতৰ আৰু মাতৃ ৰত্নগিৰি জাতৰ। বয়স ৪ বছৰ আৰু যোৱা ডেৰ বছৰ ধৰি যুৱৰাজৰ লগত আছে।
মালিকে কয় যে ফ্ৰেজেণ্ডৰ ৰক্ষণাবেক্ষণৰ বাবে প্ৰতিমাহে ডেৰ-দুইৰ পৰা তিনি লাখ টকা খৰচ হয়। ঘোঁৰাটোৰ যত্ন ল’বলৈ সদায় চাৰিজন মানুহে ঘোঁৰাটোৰ লগত থাকে।
মেলাত ঘোঁৰা এঠাইৰ পৰা আন ঠাইলৈ নিবলৈ এম্বুলেন্সৰ দৰে বিশেষ গাড়ী আছে। ঘোঁৰাটোৰ স্বাস্থ্যৰ যত্ন ল’বলৈ ২৪ ঘণ্টীয়া চিকিৎসককো নিয়োগ কৰা হয়।
ফ্ৰেজেণ্ডে এতিয়ালৈকে গুজৰাট, মহাৰাষ্ট্ৰ আৰু মধ্যপ্ৰদেশৰ বিভিন্ন প্ৰতিযোগিতাত অংশগ্ৰহণ কৰি আহিছে। আজিলৈকে কোনো ঘোঁৰাই তাক পৰাস্ত কৰিব পৰা নাই। ইয়াৰ মালিকে এই ঘোঁৰাটো পুষ্কৰ মেলালৈ বিক্ৰী কৰিবলৈ অনা নাই কেৱল প্ৰদৰ্শনৰ বাবেহে আনিছে।
Continue Reading
