ডিজিটেল ডেস্কঃ তেওঁৰ পকেটত আছিল ১০০টকীয়া বাংলাদেশী মুদ্ৰা। এই মুদ্ৰাখিনি লৈয়েই বাংলাদেশৰ কুমিল্লাৰ পৰা ত্ৰিপুৰাৰ কলমচোৰা গাঁৱৰ এখন দোকানলৈ আহিছিল কিশোৰজনে। এখন নদী পাৰ হৈ এই দীঘলীয়া যাত্ৰাপথ অতিক্ৰম কৰে এইজন কিশোৰে। সীমান্তৰক্ষীৰ চকুত ধূলি দি পাৰ হৈছিল কাঁইটীয়া তাঁৰৰ বেৰ। লক্ষ্য চকলেট, কেৱল মাত্ৰ এটা প্ৰিয় চকলেটৰ বাবে বাংলাদেশৰ পৰা ভাৰত পালেহি এজন কিশোৰে। বাংলাদেশত নোপোৱা চকলেট ক্ৰয়ৰ লক্ষ্যৰে ভাৰতত প্ৰৱেশ কৰা এইজন যুৱকে এতিয়া দৃষ্টি কাঢ়িছে সকলোৰে।
এই যুৱকজনৰ নাম ইমান হোছেইন। কিন্তু চকলেটৰ হেঁপাহত ইমানৰ অভিযান স্তব্ধ হৈ পৰে। বিএছএফ জোৱানৰ হাতত ধৰা পৰে হোছেইন। সীমান্তৰক্ষীৰ প্ৰশ্নৰ উত্তৰত হোছেইনে কয়, ‘চকলেট কিনাৰ বাহিৰে মোৰ আন কোনো উদ্দেশ্য নাই।’ পাছে যুৱকজনৰ এই স্বীকাৰোক্তিত পতিয়ন নগ’ল সীমান্তৰক্ষী। লগে লগে ইমান হোছেইনক আৰক্ষীক গতাই দিয়ে সীমান্তৰক্ষীয়ে। পৰৱৰ্তী সময়ত আদালতত হাজিৰ কৰোৱা হয় ইমান হোছেইনক আৰু ১৫ দিনৰ বাবে কাৰাগাৰেই হৈ পৰিব এইজন যুৱকৰ পৰিচয়। বেআইনীভাৱে সীমান্ত অতিক্ৰম কৰাৰ অপৰাধত বাংলাদেশী কিশোৰগৰাকীৰ বিৰুদ্ধে এটা গোচৰো ৰুজু কৰা হৈছে।
এই প্ৰসংগত আৰক্ষীয়ে কয়, ‘ইমানৰ ভাৰতলৈ অহাৰ আন কোনো কাৰণ আছে নেকি তাকে লৈ বৰ্তমান অনুসন্ধান চলি আছে । অৱশ্যে, অনুসন্ধানত ১০০ টকাৰ বাংলাদেশী মুদ্ৰাৰ বাহিৰে আন একো পোৱা নাই কিশোৰজনৰ পৰা। উপযুক্ত নথিপত্ৰ অবিহনে ভাৰতত প্ৰৱেশ কৰাৰ বাবে তেওঁক গ্ৰেপ্তাৰ কৰা হৈছে।’
Continue Reading
