এতিয়াৰে পৰা ‘দিদি মা’ নামেৰে জনা যাব উমা ভাৰতীক, টুইটাৰযোগে প্ৰকাশ কৰিলে এই কথা

ডিজিটেল ডেস্কঃ এতিয়াৰে পৰা ‘দিদি মা’ নামেৰে জনা যাব উমা ভাৰতীক। টুইটাৰযোগে এই কথা প্ৰকাশ কৰিছে বিজেপিৰ জ্যেষ্ঠ নেত্ৰী তথা মধ্যপ্ৰদেশৰ প্ৰাক্তন মুখ্যমন্ত্ৰীগৰাকীয়ে।

ইয়াৰ পূৰ্বে উমা ভাৰতীয়ে জনাইছিল যে অহা ১৭ নৱেম্বৰৰ পৰা সকলো ব্যক্তিগত সম্পৰ্ক তেওঁ চ্ছিন্ন কৰিব। ইয়াৰ কাৰণ হৈছে ১৯৯২ চনৰ ১৭ নৱেম্বৰত তেওঁ ‘সন্ন্যাস’ গ্ৰহণ কৰিছিল। ‘সন্ন্যাস’ গ্ৰহণ কৰাৰ ত্ৰিশ বছৰ পূৰ্তি উপলক্ষে তেওঁ এই পদক্ষেপ হাতত লৈছে।

আনহাতে নিজৰ নতুন সম্পৰ্কত উমা ভাৰতীয়ে জনায় যে তেওঁৰ গুৰু শ্ৰী বিদ্যাসাগৰ জী মহাৰাজৰ পৰামৰ্শমতে এই পৰিকল্পনা কৰিছে। গুৰুজনে তেওঁক কৈছিল যে ভাৰতী শব্দটোৱে সমগ্ৰ ভাৰতকে বুজায় অৰ্থাৎ দেশবাসীৰ দিদি মাতা। সেয়ে উমা ভাৰতীকো ‘দিদি মাতা’ নাম ল’বলৈ মহাৰাজে পৰামৰ্শ দিয়ে।

নিজৰ টুইটটোত তেওঁ লিখে যে সমগ্ৰ বিশ্বই তেওঁৰ নিজৰ পৰিয়াল। সেয়ে এতিয়া কেৱল এটা পৰিয়ালৰ সলনি, সকলো লোকেই তেওঁৰ পৰিয়ালৰ অন্তৰ্ভূক্ত।

“এতিয়া মোৰ নিজৰ পৰিয়ালটোও মোৰ পৰা মুক্ত আৰু মইও মোৰ পৰিয়ালৰ পৰা মুক্ত।”- উমাই লিখে।

আনহাতে, শেহতীয়াকৈ উমা ভাৰতীক ৰাজনৈতিক মঞ্চত দেখা নাপালেও সামাজিক জীৱন অতিবাহিত কৰি আছে। গুজৰাটত হ’বলগা আগন্তুক বিধানসভা নিৰ্বাচনৰ বিষয়ে উমা ভাৰতীয়ে কয় যে ৰাজ্যখনত বিজেপিয়ে বৃহৎ বিজয়সাব্যষ্ট কৰিব।