ডিজিটেল ডেস্কঃ অভূতপূৰ্ব দৰত নিলাম হ’ব এখন বিয়াৰ এটুকুৰা কে’ক। কে’ক টুকুৰাৰ দাম হ’ব ভাৰতীয় হিচাপত কমেও এক লাখ সাতাইশ হেজাৰ টকা। শুনিবলৈ আচৰিত লাগিলেও সত্য।
নিলামত দিবলগা উক্ত কে’ক টুকুৰা হৈছে প্ৰিন্সেছ ডায়েনা আৰু কিং চাৰ্লছৰ বিয়াৰ। ব্ৰিটেইনৰ এই চৰ্চিত ৰাজকীয় দম্পত্তিহালে ১৯৮১ চনত বিবাহপাশত আৱদ্ধ হৈছিল। উপস্থিত আছিল ৩০০০ গৰাকী অতিথি।
এই ৩০০০ অতিথিৰ মাজত এগৰাকী আছিল নিগেল ৰিকেটছ নামৰ এগৰাকী সৌভাগ্যৱান ব্যক্তি। ৰিকেটছে ৪১ বছৰ পুৰণি এটুকুৰা কেক সংগ্ৰহ কৰি ৰাখিছিল। কেক টুকুৰা হৈছে ডায়েনা-চাৰ্লছৰ বিয়াৰ।
বৰ্তমান ৰিকেটছ মৃত। মৃত্যুৰ পাছত তেওঁ লগত ৰখা উক্ত কেকটুকুৰাৰ বিষয়ে অনুসন্ধিৎসু মহলে জানিব পাৰে। তাৰ পাছতে কেক টুকুৰাক নিলামত দিবলৈ উলোৱা হৈছে বুলি আমেৰিকা যুক্তৰাষ্ট্ৰৰ দ্যা নিউয়ৰ্ক প’ষ্টত প্ৰকাশ পাইছে।
কেকটুকুৰা নিলাম কৰিব ড’ৰ (Dore) আৰু ৰীজ অক্চন (Rees Auctions) নামৰ ইংলেণ্ডস্থিত নিলাম সংস্থা দুটাই।
জানিব পৰামতে, উক্ত কে’ক টুকুৰা বিয়াৰ সময়ত দাম আছিল ভাৰতীয় হিচাপত ২৭ হেজাৰ টকা। বৰ্তমান উক্ত কে’কটুকুৰাৰ দাম ভাৰতীয় মূল্যত কমেও ১ লাখ ২৭ হেজাৰ হ’ব বুলি ধাৰণা কৰা গৈছে। বিয়াত এটা বাকচৰ ভিতৰত কেকটুকুৰা দিয়া হৈছিল আৰু সেই বাকচটোতে ৰিকেটছে কেকটুকুৰা সংগ্ৰহ কৰি ৰাখিছিল।
উল্লেখ্য যে প্ৰিন্সেছ ডায়েনা আৰু কিং চাৰ্লছ তৃতীয়ই ১৯৮১ চনৰ ২৯ জুলাইত বিবাহপাশত আৱদ্ধ হৈছিল। ‘ৱেডিং অৱ দ্যা চেঞ্চুৰী’ হিচাপে অভিহিত কৰা উক্ত ৰাজকীয় বিবাহখন বিশ্বজুৰি টিভিৰ পৰ্দাত কোটি কোটি লোকে উপভোগ কৰিছিল।
কিন্তু ৰাজকীয় দম্পত্তীহালৰ যুগ্ম জীৱন সুখকৰ নহ’ল। ১৯৯২ চনত দুয়োৰে মাজত সম্পৰ্ক ছিন্ন হয়। ১৯৯৬ চনত বিবাহ বিচ্ছেদ হয়।
১৯৯৭ চনৰ ৩১ আগষ্টত ডায়েনাৰ ৰহস্যজনক মৃত্যু হয়। আনহাতে, ৰাণী এলিজাবেথৰ মৃ্ত্যুৰ পাছত চাৰ্লছে শেহতীয়াকৈ গ্ৰেট ব্ৰিটেইনৰ ৰজাৰ পদবীত অধিষ্ঠিত হৈছে।
Continue Reading
