ডিজিটেল ডেস্কঃ ট্ৰেন্সজেণ্ডাৰ অভিনেতা সুশান্ত দিৱগিকাৰৰ ঘৰত অগ্নিকাণ্ড। অভিনেতাগৰাকীৰ ঘৰত সংঘটিত এই দুৰ্ঘটনাই যথেষ্ট ক্ষতিসাধন কৰিছে। এই কথা প্ৰকাশ কৰিছে তেওঁৰ ঘনিষ্ঠ বন্ধুৱে।
সুশান্তৰ বন্ধুৱে জনাইছে যে শনিবাৰে তেওঁৰ ঘৰত অগ্নিকাণ্ড হয়, সেই সময়ত তেওঁ পৰিয়ালৰ সৈতে ৰাতিৰ আহাৰ গ্ৰহণ কৰি আছিল। কিন্তু দুৰ্ঘটনাটোত অভিনেতাজনৰ লগতে তেওঁৰ পৰিয়ালৰ কোনো ক্ষতি হোৱা নাই।
সুশান্তৰ ঘৰত সংঘটিত হোৱা অগ্নিকাণ্ডত অনুৰাগীসকল স্তম্ভিত হৈ পৰিছে। এক সাক্ষাৎকাৰত সুশান্তৰ বন্ধুৱে এই দুৰ্ঘটনা কেনেদৰে সংঘটিত হৈছিল সেই কথা কৈছে। মুম্বাইত সুশান্তৰ ঘৰৰ শোৱনি কোঠাত অগ্নিকাণ্ড সংঘটিত হয়। ইয়াৰ কাৰণ এয়াৰ কণ্ডিচনাৰত শ্বৰ্ট চাৰ্কিট বুলি কোৱা হৈছে। সেই সময়ত সুশান্তই পৰিয়ালৰ সৈতে ৰাতিৰ আহাৰ খাই আছিল। হঠাতে এচিৰ পৰা ধোঁৱা ওলাই আহিল আৰু জুই লাগিল।
এই জুই বিয়পিবলৈ বেছি সময় নালাগিল। শোৱনি কোঠাৰ মাজেৰে পাৰ হৈ পাকঘৰ আৰু অন্যান্য কোঠাবোৰো পালেগৈ। অগ্নিকাণ্ডৰ বাবে সুশান্তৰ বহু ক্ষতি হৈছে। তেওঁৰ ঘৰত ৰখা বহু মূল্যবান বস্তু জ্বলি গ’ল। আনকি তেওঁৰ সন্মানত দিয়া ট্ৰফীবোৰো জ্বলি গ’ল। মেক-আপ কিট আৰু চৰকাৰী নথি-পত্ৰও জুইত নষ্ট হৈ যায়। অৱশ্যে বহু দেৰি হোৱাৰ আগতেই অগ্নিনিৰ্বাপক বাহিনীয়ে আহি জুই নিয়ন্ত্ৰণ কৰে।
ঘনিষ্ঠ আত্মীয়ৰ মতে, অগ্নিনিৰ্বাপক বাহিনীৰ লোক আহি সুশান্ত আৰু তেওঁৰ পৰিয়ালক নিৰাপদে ঘৰৰ পৰা উলিয়াই আনে। অৱশ্যে বিষয়াসকলে এতিয়াও বিষয়টোৰ তদন্ত অব্যাহত ৰাখিছে আৰু অগ্নিকাণ্ডৰ আন কোনো কাৰণ জানিবলৈ চেষ্টা অব্যাহত ৰাখিছে।
Continue Reading
