ডিজিটেল ডেস্কঃ পুনৰ এজন সহৃদয়ৱান ৰূপে নিজকে প্ৰতিষ্ঠা কৰিছে মহম্মদ ছামীয়ে৷ ভাৰতৰ ফাষ্ট বলাৰ মহম্মদ ছামীয়ে নাইনিতালত পথ দুৰ্ঘটনাত পতিত হোৱা এজনক উদ্ধাৰ কৰি ঘটনাৰ সমগ্ৰ ভিডিঅ’ ছ’চিয়েল মিডিয়াত শ্বেয়াৰ কৰিছে।ছামীয়ে ইনষ্টাগ্ৰামত এটা ভিডিঅ’ পোষ্ট কৰে, য’ত তেওঁক পথৰ পৰা গাড়ী বাগৰি পৰা এজন পথ দুৰ্ঘটনাগ্ৰস্তক সহায় কৰা দেখা গৈছে।
ছামীয়ে ইনষ্টাগ্ৰামত পোষ্ট কৰি লিখিছে- “তেওঁ ইমান ভাগ্যৱান যে ভগৱানে তেওঁক ২য় জীৱন দিলে। মোৰ গাড়ীৰ ঠিক সন্মুখতে নাইনিতালৰ ওচৰৰ পাহাৰীয়া পথটোৰ পৰা তেওঁৰ গাড়ীখন বাগৰি পৰিল। আমি তেওঁক অতি নিৰাপদে উলিয়াই আনিলোঁ।’
উল্লেখ্য যে ছামীয়ে ২০২৩ চনৰ এদিনীয়া বিশ্বকাপত আগশাৰীৰ উইকেট দখলকাৰী হিচাপে মাত্ৰ ৭খন মেচত ২৪টা উইকেট দখল কৰি। লীগ পৰ্যায়ত ছামীয়ে ভাৰতৰ প্ৰাৰম্ভিক মেচত অংশ ল’ব পৰা নাছিল যদিও পাছত শীৰ্ষ উইকেটটেকাৰ হিচাপে পৰিগণিত হয়৷ বাংলাদেশৰ বিৰুদ্ধে অলৰাউণ্ডাৰ হাৰ্দিক পাণ্ডিয়াৰ আঘাতৰ বাবে ছামীয়ে দলীয় একাদশত প্ৰৱেশৰ সুযোগ লাভ কৰে। সোঁহতীয়া পেচাৰগৰাকীয়ে দুয়োহাতেৰে সুযোগ গ্ৰহণ কৰি ধৰ্মশালাত নিউজিলেণ্ডৰ বিৰুদ্ধে পাঁচটা উইকেট দখল কৰে।
গোটেই প্ৰতিযোগিতাখনতে ছামীয়ে নিজৰ প্ৰদৰ্শনৰ স্তৰ বজাই ৰাখিছিল, কেইবাটাও অভিলেখ ভংগ কৰিছিল। ফাইনেলত ডেভিদ ৱাৰ্নাৰৰ উইকেটটো তেওঁ দখল কৰিছিল৷উল্লেখ্য যে, ১৯ নৱেম্বৰ দেওবাৰে ফাইনেলত ভাৰতক ৬ উইকেটত পৰাস্ত কৰি অষ্ট্ৰেলিয়াই অভিলেখ বৃদ্ধিৰ জৰিয়তে ষষ্ঠটো এদিনীয়া বিশ্বকাপ খিতাপ দখল কৰে।তৃতীয়বাৰৰ বাবে এদিনীয়া বিশ্বকাপৰ খিতাপ দখল কৰাৰ সুযোগ হেৰুৱাই ভাৰতে ইতিহাসত দ্বিতীয়বাৰৰ বাবে অষ্ট্ৰেলিয়াৰ বিৰুদ্ধে ফাইনেলত পৰাস্ত হয়।
Continue Reading
