ফিলিপাইনছত টাইফুনৰ তাণ্ডৱ! ১০০ৰো অধিক লোকৰ মৃত্যু

ডিজিটেল ডেস্কঃ ফিলিপাইনছত প্ৰকৃতিৰ ধ্বংসযজ্ঞ। এই বছৰ ফিলিপাইনছক আঘাত কৰা আটাইতকৈ শক্তিশালী টাইফুনত ১০০জনৰো অধিক লোকৰ মৃত্যু হোৱাৰ খবৰ পোৱা গৈছে। ৰায় নামৰ টাইফুনে ফিলিপাইনছৰ দক্ষিণ আৰু কেন্দ্ৰীয় অঞ্চলসমূহ তছনছ কৰাৰ ফলত ৩,০০,০০০ তকৈও অধিক লোকে তেওঁলোকৰ ঘৰ আৰু বীচফ্ৰণ্ট ৰিজৰ্টৰ পৰা পলায়ন কৰে। ধুমুহাৰ ফলত বহুতো অঞ্চলত যোগাযোগ আৰু বিদ্যুৎ সংযোগ ব্যাহত হয়। এই সামুদ্ৰিক ধুমুহাৰ ফলত ঘৰ ভাগিছে, কংক্ৰিটৰ বিদ্যুতৰ খুটাবোৰ ভাঙি পৰিছে আৰু গাঁওবোৰ প্লাবিত হৈ পৰিছে। ধুমুহাৰ ফলত হোৱা মৃত্যু আৰু ধ্বংসৰ সম্পূৰ্ণ পৰিমাণ মূল্যায়ন কৰিলে এই সংখ্যা বৃদ্ধি পাব।

ৰায়ে বৃহস্পতিবাৰে দেশখনত ১৯৫ কিলোমিটাৰ (১২০ মাইল) বেগেৰে ফিলিপাইনছত প্ৰৱেশ কৰিছিল। আটাইতকৈ বেছি ক্ষতিগ্ৰস্ত অঞ্চলসমূহত অনুসন্ধান আৰু উদ্ধাৰ প্ৰচেষ্টাত সহায় কৰিবলৈ হাজাৰ হাজাৰ সামৰিক বাহিনী, আৰক্ষী, উপকূলৰক্ষী বাহিনী আৰু অগ্নিনিৰ্বাপক বাহিনীৰ কৰ্মী মোতায়েন কৰা হৈছে। খাদ্য, পানী আৰু চিকিৎসা সামগ্ৰী কঢ়িয়াই অনা উপকূলৰক্ষী বাহিনী আৰু নৌ-জাহাজ প্ৰেৰণ কৰা হৈছে। দাতব্য সংস্থা আৰু জৰুৰীকালীন সেৱাসমূহে অনুদানৰ বাবে আবেদন কৰিছে। উল্লেখ্য যে জলবায়ু পৰিৱৰ্তনৰ প্ৰভাৱৰ বাবে বিশ্বৰ আটাইতকৈ দুৰ্বল ৰাষ্ট্ৰসমূহৰ ভিতৰত স্থান পোৱা ফিলিপাইনছত প্ৰতি বছৰে গড়ে ২০ টা ধুমুহা আৰু টাইফুনৰ দ্বাৰা পীড়িত হয়, এই প্ৰাকৃতিক দুৰ্যোগে সাধাৰণতে দৰিদ্ৰ অঞ্চলবোৰত শস্য, ঘৰ আৰু আন্তঃগাঁথনি মচি পেলায়।