গাজাত প্ৰতিদিনে ৪ ঘণ্টাৰ বাবে অভিযান বন্ধ ৰাখিব ইজৰাইলী বাহিনীয়ে, কিন্তু কিয়?

হোৱাইট হাউচৰ ৰাষ্ট্ৰীয় সুৰক্ষা মুখপাত্ৰ জন কাৰ্বিয়ে ইজৰাইলৰ পদক্ষেপক আদৰণি জনাইছে। তেওঁ বৰ্তমান ইজৰাইলতে আছে। তেওঁ কয়- "ইজৰাইলী সামৰিক বাহিনীৰ এই সিদ্ধান্ত গুৰুত্বপূৰ্ণ, যদিও প্ৰথম। কিন্তু ইজৰাইলৰ প্ৰধানমন্ত্ৰী বেঞ্জামিন নেতান্যাহুৱে আকৌ এবাৰ স্পষ্ট কৰি দিছে যে চাৰি ঘণ্টাৰ সময়সীমাক যুদ্ধবিৰতি বুলি ভবাটো ভুল হ'ব’’। সেই চাৰি ঘণ্টাৰ সময়ছোৱা কেৱল গাজাৰ নিৰীহ, অসামৰিক নাগৰিকসকলৰ কথা চিন্তা কৰিয়েই নিৰ্ধাৰণ কৰা হৈছে বুলি ইজৰাইলী সেনাৰ এগৰাকী বিষয়াই কয় । এই প্ৰসংগতে নেতান্যাহুৱে কয়, "হামাছৰ বিৰুদ্ধে যুঁজ যেনেকৈ আছে তেনেকৈয়ে অব্যাহত থাকিব। কিন্তু কিছু সময় দিয়া হৈছে কেৱল গাজাৰ বাসিন্দাসকলৰ বিষয়ে চিন্তা কৰি৷ যাতে তেওঁলোকে যুদ্ধক্ষেত্ৰৰ পৰা সুৰক্ষিত আশ্ৰয়স্থলীলৈ  যাব পাৰে। " ইজৰাইলৰ প্ৰধানমন্ত্ৰীগৰাকীয়ে  লগতে কয় যে হামাছৰ বিৰুদ্ধে যুদ্ধ শেষ হোৱাৰ পিছত ইজৰাইলে গাজা দখল বা নিয়ন্ত্ৰণ কৰাৰ কথা ভবা নাই৷