গান্ধী পৰিয়ালৰ ‘ৰিমট কণ্ট্ৰল’ত চলিব লাগিব নেকি কংগ্ৰেছৰ নতুন সভাপতিগৰাকী? ৰাহুল গান্ধীয়ে কি ক’লে?

ডিজিটেল ডেস্কঃ গান্ধী পৰিয়ালৰ বহতীয়া হৈয়ে চলিব নেকি কংগ্ৰেছৰ পৰৱৰ্তী সভাপতিগৰাকী? দেশৰ আটাইতকৈ পুৰণা দলটোৰ সভাপতি নিৰ্বাচনে ৰাজনীতি তোলপাৰ লগাই থকা অৱস্থাতে এই সম্পৰ্কত ৰাহুল গান্ধীয়ে এক বিশেষ ভাষ্য আগবঢ়াইছে।

কৰ্ণাটকত কংগ্ৰেছৰ ‘ভাৰত জোড় যাত্ৰা’ত অংশ লৈ গান্ধীয়ে সাংবাদিকক কয় যে দলৰ নীতি-নিৰ্দেশনা পালনৰ ক্ষেত্ৰত সভাপতিগৰাকীক সম্পূৰ্ণ স্বাধীনতা পালন কৰিব। গান্ধী পৰিয়ালৰ ইয়াত কোনো হাত নাথাকিব।

উল্লেখযোগ্য যে সূদীৰ্ঘ ২২ বছৰৰ মূৰত ১৭ অক্টোবৰত কংগ্ৰেছৰ সভাপতি নিৰ্বাচন অনুষ্ঠিত হ’ব। সভাপতি পদৰ বাবে প্ৰতিদ্বন্দিতা আগবঢ়াইছে জ্যেষ্ঠ নেতা মল্লিকাৰ্জুন খৰ্গে আৰু শশী থাৰুৰে। এই নিৰ্বাচনক লৈ কংগ্ৰেছৰ বিৰোধী পক্ষই ব্যাপক তীপ্পনি প্ৰদান কৰি আহিছে। তেওঁলোকে কৈছে যে কংগ্ৰেছৰ নতুন সভাপতিজনো গান্ধী পৰিয়ালৰ ‘ৰিমট কণ্ট্ৰ’ল’ত চলিব লাগিব।

কিন্তু ৰাহুল গান্ধীয়ে ইয়াৰ প্ৰত্যুত্তৰত কয় যে সভাপতি নিৰ্বাচনত অংশ লোৱা দুয়োজন নেতাৰে নিজৰ বিচাৰ বিবেচনা আছে। সেয়ে ‘ৰিমট কণ্ট্ৰল’ৰ প্ৰসংগ ইয়াত আহিবই নালাগে।

কংগ্ৰেছৰ দলীয় স্থিতি সম্পৰ্কেও ৰাহুল গান্ধীয়ে সাংবাদিকসকলৰ ব্যক্ত কৰে। কয় যে কংগ্ৰেছ এটা ফেচিষ্ট দল নহয়। কংগ্ৰেছ দলে আলাপ-আলোচনা আৰু ভিন্ন দৃষ্টিভংগীক বিশ্বাস কৰি আহিছে। দেশৰ বৈচিত্ৰতা, সংবিধান সম্পৰ্কেও ৰাহুল গান্ধীয়ে উল্লেখ কৰে।

শাসকীয় দল বিজেপিক আক্ৰমণ কৰি গান্ধীয়ে কয় যে বিজেপিয়ে দেশখন ভাগ ভাগ কৰি আহিছে আৰু দেশত ঘৃণা বিয়পাইছে। ই দেশৰ বাবে কোনোধৰণৰ হিতজনক নহয়। সেয়ে কংগ্ৰেছে ‘ভাৰত জোড় যাত্ৰা’ কাৰ্যসূচী হাতত লৈছে।