গান্ধীয়ে নিশা কটোৱা পানবজাৰৰ সেই বাসগৃহটোৰ আজি কি অৱস্থা !

ডিজিটেল ডেস্ক: প্ৰায় ১০০ বছৰ পুৰণি এটি গৃহ৷ তাৰ ভিতৰত থকা কাঠৰ আলমিৰাত পৰি ৰৈছে বহু পুৰণি গ্ৰন্থ-আলোচনী৷ কেইখনমান ডেস্ক, চকীৰ সৈতে কোঠাটোৰ ভিতৰত প্ৰৱেশ কৰিলেই আপুনি অনুভৱ কৰিব এটি পুৰণি সুৱাস৷ ৪৪ বছৰ পূৰ্বে পুথিভঁৰাল হিচাপে পৰিচয় লাভ কৰা ঘৰটোৰ বেৰৰ জলঙাইদিও পৰিছে ৰ’দৰ এচমকা পোহৰ৷ মলিয়ন ডেস্কৰ ওপৰত পৰি ৰৈছে বছৰ বাগৰা খবৰ কাকতো৷ বেৰত ওলমি আছে মহাত্মা গান্ধীৰ এখন ক’লা বগা ফটো৷ পাণবজাৰৰ মাজমজিয়াৰ এচুকত থকা বাটামকচা ঘৰটো দেখিলে অনুধাৱন কৰিব পাৰিব সেয়া যে অত্যন্ত এটি পুৰণি গৃহ৷

১৯৭৭ চনত স্থাপিত এটি পুথিভঁৰাল৷ ইণ্টাৰনেট, ছ’চিয়েল মিডিয়াই সমাজ জীৱন গ্ৰাহ কৰাৰ পূৰ্বেই গুৱাহাটীৰ পাণবজাৰত স্থাপন কৰা হৈছিল এই পুথিভৰাঁলটো৷ সেই সময়ছোৱাত অধ্যয়নৰ প্ৰতি ধাউতি থকা প্ৰতিগৰাকী লোকেই আহিছিল এই পুথিভৰাঁলটোলৈ৷ কলেজীয়া ছাত্ৰ-ছাত্ৰীৰ পৰা আৰম্ভ কৰি অধ্যয়নপুষ্ট সাধাৰণ ব্যক্তিগৰাকীলৈকে৷ সেই পুথিভৰাঁলতে পৰি ৰৈছে এটি ১০০ বছৰীয়া লেফাফাৰ বাকচো৷ পূৰ্বে এটি সাধাৰণ বাসগৃহ হিচাপে থকা এই ঘৰতো ভাৰতৰ স্বাধীনতা সংগ্ৰাম চলি থকাৰ সময়তে ১৯৩৪ চনত জাতিৰ পিতা মহাত্মা গান্ধীয়েও পদধূলা পেলাইছিল৷ স্বাধীনতা সংগ্ৰামী ডাঃ হৰেকৃষ্ণ দাসৰ আছিল এই গৃহটো (বৰ্তমান পুথিভৰাঁল)৷

প্ৰায় ১০হাজাৰ কিতাপ আছে এই পুথিভৰাঁলটোত

অসমৰ প্ৰথমগৰাকী চিকিৎসক আছিল ডাঃ হৰেকৃষ্ণ দাস৷ ডিব্ৰুগড়ত চিকিৎসা সেৱা আগবঢ়াইছিল দাসে৷ স্বাধীনতা সংগ্ৰামৰ সমান্তৰালকৈ তেওঁ আছিল সমাজৰ এজন পুৰুধা ব্যক্তি৷ জীৱনকালত দাসৰ যিমান সম্পত্তি আছিল সকলোখিনিয়ে দান কৰি গৈছিল সমাজৰ বাবে৷ তাৰেই এক উল্লেখযোগ্য উদাহৰণ এই পুথিভৰাঁলটো৷ তেওঁৰ মৃত্যুৰ পাছতে ডাঃ হৰেকৃষ্ণ দাসৰ সোঁৱৰণত এই গৃহটো ৰূপান্তৰ কৰা হয় পুথিভৰাঁললৈ৷ প্ৰায় ১০হাজাৰ কিতাপ আছে এই পুথিভৰাঁলটোত৷ তেতিয়াৰেপৰা সুন্দৰকৈ চলি থকা পুথিভৰাঁলটোৰ সহায় লৈ বহুকেইজনে ডক্টৰেট ডিগ্ৰীও লাভ কৰিবলৈ সক্ষম হৈছিল৷

অৱশ্যে সময়ৰ সোঁতত যেন পুথিভৰাঁলটোৰ অস্তিত্বও লোপ পাই গৈছে৷ জহি-খহি গৈছে বেৰসমূহ৷ ধূলি মাকতিৰে পোঁত খাই পৰিছে কিতাপসমূহো৷ পঢ়ুৱৈৰ সংখ্যা যে নগন্য সেয়া স্পষ্ট হৈ পৰিছে৷ মকৰাৰ জালে ছানি ধৰা কাঠৰ আলমিৰাৰ ওপৰতে পঁচি গৈছে ১০০ বছৰীয়া পুৰণি সেই চিঠিৰ বাকচটো৷ সৰ্বোদয় ট্ৰাষ্টৰ দ্বাৰা পৰিচালিত এজন কৰ্মচাৰীয়ে পৰিচালিত হৈ থকা পুথিভঁৰালটো অৱক্ষয়ৰ মূল কাৰণে যে চোৱা-চিতাৰ অভাৱ সেয়া নিশ্চিত৷ লকডাউনৰ প্ৰভাৱো নপৰা নহয়৷ নতুন গ্ৰন্থ-আলোচনী বুলিবলৈ একোৱেই নাই৷ পুৰণি কিতাপ কেইখনতো পোকৰ ৰাজত্ব৷ মুঠৰ ওপৰত যেন এফালৰ পৰা নিঃশেষ হ’বলৈ ধৰিছে সকলোবোৰ৷