ডিজিটেল ডেস্কঃ গীৰ্জাত চলি আছিল প্ৰাৰ্থনা ৷ হঠাতে গাৰ্জাৰ ভিতৰত প্ৰৱেশ কৰিলে অস্ত্ৰ-শস্ত্ৰৰে সু-সজ্জিত সন্ত্ৰাসবাদৰ এটা দলে৷ কোনো কথাৰ অৱতাৰণা নকৰাকৈয়ে সন্ত্ৰাসবাদীয়ে আৰম্ভ কৰিলে গুলীবৰ্ষণ৷ ঘটনাটো ঘটিছে দক্ষিণ-পশ্চিম নাইজেৰিয়াৰ এটা কেথলিক গীৰ্জাত৷
গীৰ্জাঘৰটোত দেওবাৰে সন্ত্ৰাসবাদীয়ে প্ৰৱেশ কৰি প্ৰাৰ্থনা কৰি থকা লোকসকলৰ ওপৰত গুলীচালনা কৰাত ৫০ জনৰো অধিক লোকৰ মৃত্যু ঘটাৰ খবৰ আহিছে৷সন্ত্ৰাসবাদীয়ে গীৰ্জাটোত বোমা বিস্ফোৰণ ঘটোৱা বুলিও জানিব পৰা গৈছে৷
এজন আৰক্ষী বিষয়াই জনোৱা অনুসৰি আক্ৰমণকাৰীসকলে ওণ্ডো প্ৰদেশৰ ছেইণ্ট ফ্ৰান্সিছ কেথলিক গীৰ্জাত এই আক্ৰমণৰ ঘটনা সংঘটিত কৰে৷ নিহতসকলৰ ভিতৰত বহু কেইটা শিশুও থকা বুলি আৰক্ষী বিষয়াগৰাকীয়ে জানিবলৈ দিয়ে৷
নাইজেৰিয়াৰ এগৰাকী চৰকাৰী বিষয়া এডেলেগবে টিমাইলিনে কয় যে আক্ৰমণ সংঘটিত কৰি সন্ত্ৰাসবাদীয়ে গীৰ্জাটোৰ ফাদাৰজনকো অপহৰণ কৰি নিয়ে৷
নিহতৰ সংখ্যা আৰু অধিক বৃদ্ধি পাব পাৰে বুলি টিমাইলিনে প্ৰকাশ কৰে৷ নাইজেৰিয়াৰ ৰাষ্ট্ৰপতি মহম্মদ বুহাৰীয়ে এই আক্ৰমণৰ ঘটনাক গৰিহণা দি সন্ত্ৰাসবাদীৰ বিৰুদ্ধে কঠোৰ ব্যৱস্থা গ্ৰহণৰ নিৰ্দেশ দিছে৷
গীৰ্জাঘৰটোত কোনে আক্ৰমণ সংঘটিত কৰিলে সেয়া এতিয়াও স্পষ্ট হোৱা নাই৷ কোনো সন্ত্ৰাসবাদী সংগঠনেও আক্ৰমণৰ ঘটনাৰ দায়িত্ব স্বীকাৰ কৰা নাই৷ ঘটনাটোত দেশ খনৰ সন্ত্ৰাসবাদী সংগঠন বকো হাৰাম জৰিত থাকিব পাৰে বুলি বহুতে সন্দেহ কৰিছে৷
ইছলামিক সন্ত্ৰাসবাদী সংগঠনটোৱে ইয়াৰ পূৰ্বেও নাইজেৰিয়াৰ কেইবাটাও গীৰ্জাত আক্ৰমণ চলাই বহুলোকৰ প্ৰাণ কাঢ়ি নিছিল৷চলিত বৰ্ষৰ ৮ মাৰ্চত সন্ত্ৰাসবাদীয়ে নাইজেৰিয়াৰ কে বি প্ৰদেশত এটা গাওঁৰক্ষী বাহিনীৰ দলৰ ওপৰত আক্ৰমণ চলাই ৬২ জন লোকক হত্যা কৰিছিল৷
Continue Reading
