ডিজিটেল ডেস্ক: অভিযোগ গ্ৰন্থ চুৰি৷ এখন দুষ্প্ৰাপ্য প্ৰাচীন গ্ৰন্থ চুৰি কৰাই কাল হ’ল যুৱকজনৰ বাবে৷ ৰোষত পৰিল আৰক্ষীৰ৷ এতিয়া গোচৰ চলিব যুৱকজনৰ বিৰুদ্ধে৷
উধাগমণ্ডলমৰ ১৬০ বছৰ পুৰণি নীলগিৰি পুথিভঁৰাল৷ আৰু এই নীলগিৰি পুথিভঁৰালৰ পৰাই ১১৬ বছৰ এখন পুৰণি কিতাপ চুৰি কৰাৰ অভিযোগত বেংগালুৰুৰ ৩৪ বছৰীয়া এজন যুৱক গ্ৰেপ্তাৰ হ’বলগীয়া হৈছে।
আৰক্ষী বিষয়াসকলে অভিযুক্তজনক বেংগালুৰুৰ কোৰামংগলাৰ বাসিন্দা ৩৪ বছৰীয়া কাতিত্ৰা দেবনাথ বুলি চিনাক্ত কৰিছে৷ বিষয়াসকলৰমতে, অক্টোবৰত উটী লিটাৰেচাৰ ফেষ্ট সম্পূৰ্ণ হোৱাৰ পাছত পুথিভঁৰালৰ কাৰ্যালয়ৰ কৰ্মকৰ্তাসকলে কিতাপসমূহৰ বুজ লৈ আছিল৷ তেতিয়া তেওঁলোকে অনুভৱ কৰিছিল যে কৰ্ণেল জন বিদ্দুল্ফৰ শতিকাপ্ৰাচীন গ্ৰন্থ ‘দ্য পাইৰেটছ অব্ মালাবাৰ এণ্ড এন ইংলিশ ৱ’মেন’ পুথিভঁৰালটোৰ সংগ্ৰহৰ পৰা অন্তৰ্ধান হৈছে৷
তাৰ পাছত পুথিভঁৰালটোৰ এজন কাৰ্যালয় বিষয়াই নীলগিৰি জিলা আৰক্ষীৰ ওচৰত এটা অভিযোগ পঞ্জীয়ন কৰিছিল৷ আৰু পৰৱৰ্তী সময়ত আৰক্ষীয়ে তদন্ত আৰম্ভ কৰিছিল। কেইসপ্তাহমানৰ পাছত ইনষ্টাগ্ৰামৰ জৰিয়তে কিতাপখন বিক্ৰী কৰাৰ বিষয়ে খবৰ দিয়া হৈছিল। তেওঁলোকে চাইবাৰ অপৰাধ কোষৰ সহায়ত মোবাইল ফোন ব্যৱহাৰকাৰীৰ বিৱৰণ অনুসৰণ কৰিছিল আৰু মোবাইল ফোন নম্বৰটো দেবনাথৰ বুলি বিচাৰি উলিয়াইছিল৷ পৰৱৰ্তী সময়ত যুৱকজনক গ্ৰেপ্তাৰ কৰা হৈছিল আৰু নীলগিৰিলৈ অনা হৈছিল, য’ত তেওঁক ন্যায়িক জিম্মালৈ প্ৰেৰণ কৰা হৈছিল।
আৰক্ষী বিষয়াসকলে কৈছিল যে দেবনাথে সমগ্ৰ ভাৰতৰ পৰা বিৰল কিতাপ চুৰি কৰি আৰু সেইবোৰ সংগ্ৰাহকসকলক বিক্ৰী কৰি জীৱিকা অৰ্জন কৰে৷ গ্ৰেপ্তাৰৰ সময়ত তেওঁৰ ঘৰৰ পৰা সমগ্ৰ ভাৰতৰ পৰা চুৰি কৰা বিৰল কিতাপৰ এটা বৃহৎ অংশ জব্দ কৰা হৈছে। তেওঁলোকে কয় যে তেওঁ পুথিভঁৰালৰ পৰা চুৰি হোৱা কিতাপখন ১০,০০০ টকাৰো অধিক দামত বিক্ৰী কৰাৰ আশা কৰিছিল।
Continue Reading
