ডিজিটেল ডেস্কঃ গুজৰাটৰ পঞ্চমহল জিলাৰ হালোল চহৰৰ এখন আদালতে ২০০২ চনৰ গোধৰাকাণ্ডৰ পিছতসংঘটিত হিংসাত্মক ঘটনাত জড়িত থকা বুলি অভিযোগ উঠা ৩৫ জন লোকক নিৰ্দোষী ঘোষণা কৰিছে। গোধৰা কাণ্ডৰ পিছত সংঘটিত সেই হিংসাত তিনিজন লোক নিহত হৈছিল।
হালোল চহৰৰ এখন আদালতৰ অতিৰিক্ত সত্ৰ ন্যায়াধীশ হৰিশ ত্ৰিবেদীয়ে "ছদ্মবেশী-ধৰ্মনিৰপেক্ষ মাধ্যম আৰু ৰাজনীতিকসকলে " এই সংঘৰ্ষবোৰ পূৰ্বপৰিকল্পিত আছিল বুলি কৰা দাবীৰ বাবে সমালোচনাও কৰে।
উল্লেখ্য গোধৰাত সবৰমতী এক্সপ্ৰেছত তীৰ্থযাত্ৰীৰ মৃত্যুৰ পিছত গুজৰাটৰ কেইবা ঠাইতো হিংসাৰ জুই জ্বলি উঠিছিল। বহুতে অভিযোগ কৰিছিল যে সেই সময়ত সংঘৰ্ষত হাজাৰ হাজাৰ লোক নিহত হৈছিল। ২৮ ফেব্ৰুৱাৰী, ২০০২ তাৰিখে কালোল বাছ ষ্টেণ্ড, দেলোল গাওঁ আৰু দেৰোল ষ্টেচন এলেকাত সংঘৰ্ষ আৰম্ভ হৈছিল। তিনিওজন লোকক চোকা অস্ত্ৰৰে আক্ৰমণ কৰি জ্বলাই হত্যা কৰা হৈছিল । মৃতদেহবোৰ কেইদিনমানপিছত উদ্ধাৰ কৰা হৈছিল। গোচৰটোত ৩৫ জন লোকক অভিযুক্ত কৰা হৈছিল।
আৰু পঢ়ক: ধাৰাসাৰ বৰষুণৰ ফলত উত্তৰ ছিকিমত ভয়ংকৰ ভূমিস্খলন, যোগাযোগ বিচ্ছিন্ন, প্ৰায় ২,০০০ পৰ্যটক আৱদ্ধ
অৱশ্যে আদালতে তেওঁলোকৰ দোষ প্ৰমাণ কৰিবলৈ পৰ্যাপ্ত তথ্য নথকাৰ বাবে আটাইকেইজনকে দোষমুক্ত ঘোষণা কৰে।২০ বছৰ আগলৈকে গোচৰটোত ৫২ জন অভিযুক্তৰ নাম আছিল। তেওঁলোকৰ ভিতৰৰে ১৭ জনৰ ইতিমধ্যে মৃত্যু হৈছে। অভিযুক্ত সকলোকে গ্ৰেপ্তাৰ কৰা হৈছিল আৰু কাৰাগাৰলৈ প্ৰেৰণ কৰা হৈছিল। সকলোকে পিছত জামিনত মুক্তি লাভ কৰিছিল।
শুনানিৰ সময়ত ১৩০ জন লোকে সাক্ষ্য দিছিল। বিচাৰকজনে কয় যে অভিযুক্তপক্ষই সংঘৰ্ষৰ সময়ত সহযোগ কৰা আৰু তেওঁলোকৰ পৰা অস্ত্ৰ উদ্ধাৰৰ কোনো প্ৰমাণ পোৱা হোৱা নাই ।তেওঁ লগতে কয় যে সেয়া স্বতঃস্ফূৰ্ত হিংসা আছিল আৰু "পূৰ্বপৰিকল্পিত" নাছিল।
Continue Reading
