গোলাঘাটত অৰুণোদয় আঁচনিৰ বঞ্চনাক লৈ মহিলাৰ প্ৰতিবাদ

গোলাঘাট জিলাৰ মহমাইকী গাঁও পঞ্চায়তৰ অন্তৰ্গত একাংশ মহিলাই শেহতীয়াকৈ গোলাঘাট পশ্চিম উন্নয়ন খণ্ড কাৰ্যালয়ৰ সন্মুখত প্ৰতিবাদ সাব্যস্ত কৰে। তেওঁলোকে অভিযোগ কৰিছে যে ৰাজ্য চৰকাৰৰ গুৰুত্বপূৰ্ণ অৰুণোদয় আঁচনিৰ পৰা তেওঁলোকক অযথাভাৱে বঞ্চিত কৰা হৈছে।

প্ৰতিবাদকাৰী মহিলাসকলে জনোৱা মতে, তেওঁলোক অৰুণোদয় আঁচনিৰ বাবে যোগ্য হোৱা স্বত্বেও তেওঁলোকৰ নাম তালিকাৰ পৰা বাদ দিয়া হৈছে। তেওঁলোকে লগতে অভিযোগ কৰে যে বহু বিত্তশালী আৰু অযোগ্য মহিলাই এই আঁচনিৰ সুবিধা লাভ কৰি আছে, আনহাতে প্ৰকৃততে যোগ্য মহিলাসকলক বঞ্চিত কৰা হৈছে। চিপাহী গাঁৱৰ এই মহিলাসকলৰ মাজত কেইবাগৰাকীও বৃদ্ধা মহিলাও আছিল, যিসকলে কেৱল অৰুণোদয়ৰ পৰাই নহয়, আন আন চৰকাৰী আঁচনিৰ পৰাও বঞ্চিত হোৱাৰ অভিযোগ উত্থাপন কৰিছে।

গণমাধ্যমৰ আগত তেওঁলোকে এই বঞ্চনাক লৈ তীব্ৰ ক্ষোভ আৰু হতাশা ব্যক্ত কৰে। এই অভিযোগসমূহে চৰকাৰী আঁচনিসমূহৰ সঠিক ৰূপায়ণ আৰু যোগ্য হিতাধিকাৰীৰ বাছনি প্ৰক্ৰিয়াৰ ওপৰত প্ৰশ্ন উত্থাপন কৰিছে। প্ৰতিবাদকাৰীসকলে শীঘ্ৰেই বিষয়টোৰ ওপৰত চৰকাৰৰ হস্তক্ষেপ আৰু ন্যায় বিচাৰিছে।