গৃহযুদ্ধত জৰ্জৰিত চুদানত কেনে আছে ভাৰতীয়সকল? উদ্বিগ্ন প্ৰধানমন্ত্ৰী মোদী, অনুষ্ঠিত কৰিলে জৰুৰী বৈঠক

বৈঠকত মোদীয়ে  চুদানৰ পৰিস্থিতিৰ মূল্যাঙ্কন কৰে৷  বৰ্তমান সংঘৰ্ষগ্ৰস্ত দেশখনত থকা ৩,০০০ তকৈও অধিক ভাৰতীয় নাগৰিকৰ সুৰক্ষাৰ বিষয়ত মোদীয়ে  গুৰুত্ব আৰোপ কৰে। এক চৰকাৰী বিবৃতি অনুসৰি মোদীয়ে  উচ্চ পৰ্যায়ৰ বৈঠকত চুদানত থকা  ভাৰতীয় নাগৰিকসকলৰ সুৰক্ষা নিশ্চিত  কৰিবলৈ   নিৰ্দেশ দিয়ে। মোদীয়ে  যোৱা সপ্তাহত চুদানত নিহত এজন ভাৰতীয় নাগৰিকৰ মৃত্যুত শোক প্ৰকাশ কৰে।  প্ৰধানমন্ত্ৰীয়ে চুদানৰ চুবুৰীয়া দেশসমূহৰ  সৈতে  যোগাযোগ বজাই ৰাখি চুদানৰ পৰা ভাৰতীয় লোকসকলক উদ্ধাৰৰ পৰিকল্পনা কৰিবলৈ কয়৷

 ইপিনে  বৈদেশিক পৰিক্ৰমা মন্ত্ৰী জয়শংকৰে ২০ এপ্ৰিলত নিউয়ৰ্কত ৰাষ্ট্ৰসংঘৰ মহাসচিব এণ্টনিঅ' গুটেৰেছক  সাক্ষাৎ কৰি আৰু চুদানৰ পৰিস্থিতিৰ বিষয়ে আলোচনা কৰিছিল। জয়শংকৰে কৈছিল যে ভাৰত চৰকাৰে চুদানত আৱদ্ধ হৈ থকা নাগৰিকসকলৰ সৈতে নিৰন্তৰ যোগাযোগ  কৰি আছে।চুদানৰ পৰা ভাৰতীয় লোক স্থানান্তৰিত কৰাত জয়শংকৰে ৰাষ্ট্ৰ সংঘৰো সহায় বিচাৰিছে৷ ইপিনে চুদানত সংঘৰ্ষ বৃদ্ধি হোৱাৰ লগে লগে  হাজাৰ হাজাৰ নাগৰিকে চুদানৰ ৰাজধানী খাৰ্তুমৰ পৰা পলায়ন কৰিছে। বাতৰি অনুসৰি এতিয়ালৈকে সংঘৰ্ষত এজন ভাৰতীয়সহ ৩৫০ ৰো অধিক লোক নিহত হৈছে। চুদানৰ সেনা প্ৰধান আব্দেল ফাত্তাহ আল-বুৰহানৰ অনুগত বাহিনী আৰু অৰ্ধসামৰিক দ্ৰুত সমৰ্থন বাহিনীৰ (আৰএছএফ) কমাণ্ড কৰা তেওঁৰ ডেপুটি মহম্মদ হামদান দাগ্লোৰ বাহিনীৰ মাজত এই যুঁজ চলি আছে।