ডিজিটেল ডেস্কঃ গুজৰাট নিৰ্বাচনত অৱতীৰ্ণ হোৱা ৰবীন্দ্ৰ জাডেজাৰ পত্নী ৰিৱাবা জাডেজাৰ এখন প’ষ্টাৰক লৈ বিতৰ্কৰ সৃষ্টি হৈছে। শাসনাধীষ্ট বিজেপিৰ হৈ নিৰ্বাচন খেলা ৰিৱাবাৰ প’ষ্টাৰখনত ক্ৰিকেটাৰগৰাকীৰ এখন ফটো আছে। তাত তেওঁ ভাৰতীয় দলৰ জাৰ্চি পৰিধান কৰি আছে।
প’ষ্টাৰখনৰ বিৰোধিতা কৰি আম আদমী পাৰ্টিৰ এগৰাকী সাংসদে টুইটাৰযোগে কয় যে পূৰ্বে ক্ৰীড়াবিদসকল ৰাজনীতিৰ পৰা আঁতৰি আছিল। কিন্তু এতিয়া মুকলিকৈ ৰাজনীতি কৰা আৰম্ভ কৰিছে।
''বিজেপিয়ে কোনো প্ৰতিষ্ঠান ধ্বংস কৰিবলৈ এৰা নাই।’’- আপ সাংসদ বাল্যানে কয়।
উল্লেখ্য যে ৰবীন্দ্ৰ জাডেজাৰ পত্নীয়ে কেইদিনমানৰ পূৰ্বে এটা সাক্ষাৎকাৰত কৈছিল যে ক্ৰিকটাৰগৰাকীয়ে তেওঁক ৰাজনৈতিক কেৰিয়াৰ আৰম্ভ কৰাত আকুণ্ঠ সমৰ্থন আগবঢ়াইছে।
''কোৱা হয় যে প্ৰত্যেক পুৰুষৰ সফলতাৰ আঁৰত এগৰাকী নাৰী থাকে। সেইদৰে, এইটোও গুৰুত্বপূৰ্ণ যে প্ৰতিগৰাকী মহিলাৰ সফলতাৰ আঁৰত তেওঁৰ স্বামী আৰু ভাতৃ থাকে।’’- ৰিৱাবাই এইদৰে কৈছিল।
আপৰ উপৰিও টুইটাৰত কেইবাজনো লোকে প’ষ্টাৰখন সন্দৰ্ভত বিচিচিআইৰ প্ৰতি প্ৰশ্ন উত্থাপন কৰিছে। তেওঁলোকে সুধিছে যে ভাৰতীয় ক্ৰিকেট দলৰ জাৰ্চি নিৰ্বাচনত ব্যৱহাৰ কৰাৰ অনুমতি আছেনে?
Continue Reading
