ডিজিটেল ডেস্কঃ পাৰ চৰাই সকলোৰে চিনাকী। বিভিন্ন ৰঙৰ পাৰ চৰাই আমি দেখি আহিছো যদিও গুলপীয়া পাৰ চৰাই কেতিয়াও দেখা নাই। কিন্তু শেহতীয়াকৈ তেনে এটা গুলপীয়া পাৰ চৰায়ে বহুতৰে মনত কৌতূহলৰ সৃষ্টি কৰিছে।ব্ৰিটেইনৰ বাৰি টাউন চেণ্টাৰত এটা গুলপীয়া পাৰ চৰাই দেখা গৈছে। 
পাৰ চৰাইটোৰ অস্বাভাৱিক ৰঙে সকলোকে আচৰিত কৰি তুলিছে। স্থানীয় লোক আৰু আৰক্ষীয়ে চৰাইটোৰ পাখিত কোনোবাই ৰং সানি দিছে নেকি সেয়া পৰীক্ষা কৰি আছে।
গুলপীয়া পাৰ চৰাইটোৱে পথত খাদ্য গ্ৰহণ কৰা আৰু ছাদত বহি থকা দেখা গৈছে।ইতিমধ্যে ইণ্টাৰনেটত গুলপীয়া পাৰ চৰাইটোৰ ছবি ভাইৰেল হৈ পৰিছে। 
লক্ষ্যণীয় কথাটো হ’ল গুলপীয়া পাৰ চৰাই দেখা এয়াই প্ৰথম ঘটনা নহয়, ইয়াৰ পূৰ্বেও আন এটা গুলপীয়া পাৰ চৰায়ে সংবাদ শিৰোনাম দখল কৰিছিল। ইয়াৰ আগতে নিউয়ৰ্ক চহৰৰ মেডিচন স্কোৱেৰ পাৰ্কত একে ধৰণৰ পাৰ চৰাই দেখা পোৱা গৈছিল।
Continue Reading
