ডিজিটেল ডেস্কঃ উচ্চতম ন্যায়ালয়ে ৰ’ বনাম ৱেডৰ গুৰুত্বপূৰ্ণ সিদ্ধান্ত বাতিল কৰি এক মাৰাত্মক ভুল কৰা বুলি মন্তব্য কৰিছে আমেৰিকাৰ ৰাষ্ট্ৰপতি জো বাইডেনে। এটা টুইটত বাইডেনে লিখিছে, ‘আদালত যিটো কাম আগতে কেতিয়াও কৰা নাছিল এইবাৰ তাকে কৰিছেঃ স্পষ্টভাৱে বহু আমেৰিকান লোকৰ এক মৌলিক সাংবিধানিক অধিকাৰ কাঢ়ি লোৱা হৈছে। এই সিদ্ধান্তৰ ফলত দেশখন ১৫০ বছৰ পিছুৱাই যাব।’
আমেৰিকাৰ উচ্চতম ন্যায়ালয়ে ৰ’ বনাম ৱেডৰ সিদ্ধান্ত বাতিল কৰাৰ মাত্ৰ কেইঘণ্টামানৰ পিছতে জো বাইডেনে দেশবাসীক সম্বোধন কৰে। আদালতৰ এই সিদ্ধান্তৰ ফলত গৰ্ভধাৰণৰ ১৫ সপ্তাহৰ পিছত গৰ্ভপাত কৰিব বিচৰা মহিলাসকলৰ বাবে সাংবিধানিক সুৰক্ষা কৱচ প্ৰত্যাহাৰ হয়।
আমেৰিকাৰ ৰাষ্ট্ৰপতি জো বাইডেনে গৰ্ভপাতৰ ৰায়ৰ ফলত প্ৰভাৱিত হোৱা বিভিন্ন ৰাজ্যৰ মহিলাসকলৰ অধিকাৰ সুৰক্ষিত কৰাৰ বাবে নিজৰ সামৰ্থ্য অনুসৰি সকলোখিনি কৰি যোৱাৰ প্ৰতিশ্ৰুতিও দিছে।
তেওঁ লগতে কয় যে, ‘এইটো এটা চৰম আৰু বিপজ্জনক পথ।’ অৱশ্যে তেওঁ সকলোকে শান্তিপূৰ্ণ প্ৰতিবাদ বৰ্তাই ৰাখিবলৈ আহ্বান জনাইছে। গৰ্ভপাতৰ ৰায়দানে গৰ্ভনিৰোধক আৰু সমলিংগ বিবাহৰ অধিকাৰক ক্ষতিগ্ৰস্ত কৰিব পাৰে বুলিও সকীয়াই দিয়ে মাৰ্কিন ৰাষ্ট্ৰপতিগৰাকীয়ে।
আমেৰিকাৰ উচ্চতম ন্যায়ালয়ৰ ৬-৩ ৰায়দানে ৰিপাব্লিকান দলৰ সমৰ্থিত মিচিচিপি আইনখন সমৰ্থন কৰিছে। এই আইন অনুসৰি গৰ্ভাৱস্থাৰ ১৫ সপ্তাহৰ পিছত গৰ্ভপাত নিষিদ্ধ কৰা হৈছে।
১৯৭৩ চনৰ ৰ’ বনাম ৱেডৰ গোচৰৰ গুৰুত্বপূৰ্ণ ৰায়দানত এগৰাকী মহিলাৰ গৰ্ভপাতৰ সাংবিধানিক অধিকাৰক স্বীকৃতি দিয়া হৈছিল আৰু সমগ্ৰ দেশতে তেওঁক বৈধতা প্ৰদান কৰা হৈছিল। ৰিপাব্লিকান আৰু ধৰ্মীয় ৰক্ষণশীলসকলে এই প্ৰক্ৰিয়াটো সীমিত বা নিষিদ্ধ কৰিব বিচাৰিছিল। গৰ্ভপাতৰ অধিকাৰক সমৰ্থন কৰা গৱেষণা সংস্থা গুটমেকাৰ ইনষ্টিটিউটৰ তথ্য অনুসৰি ২৬খন ৰাজ্যত গৰ্ভপাত নিষিদ্ধ কৰাৰ সম্ভাৱনা আছে।
Continue Reading
