গৰ্ভস্থ শিশুৰ মগজুত পোৱা গ’ল প্ৰদূষণৰ বিষাক্ত কাৰ্বন, বিজ্ঞানীসকলো আচৰিত…

 ডিজিটেল ডেস্ক : প্ৰতিদিনে সমগ্ৰ বিশ্বতে প্ৰদূষণৰ মাত্ৰা বিপজ্জনকভাৱে বৃদ্ধি পাইছে। পাছলৈ ই আৰু অধিক বিপদসংকুল হৈ পৰাৰ আশংকাই ইতিমধ্যে বিজ্ঞানীসকলৰ লগতে সকলোকে চিন্তিত কৰি তুলিছে। এনে পৰিস্থিতিৰ পৰিপ্ৰেক্ষিতত এটা ঘটনাই বিজ্ঞানী মহলকো জোকাৰি গৈছে। প্ৰদূষণৰ কিছু বিপজ্জনক কাৰ্বন এতিয়া পোৱা গৈছে গৰ্ভস্থ শিশুৰ মগজু আৰু হাওঁফাওঁত। এই ঘটনাই সকলোকে স্তম্ভিত কৰি তুলিছে।

 দৰাচলতে ‘দ্য গাৰ্ডিয়ান’ত প্ৰকাশিত এক প্ৰতিবেদন অনুসৰি ব্ৰিটেইনৰ ইউনিভাৰ্চিটী অব এবাৰডিন আৰু বেলজিয়ামৰ হেচেল্ট ইউনিভাৰ্চিটীৰ গৱেষকসকলে যৌথভাৱে এই গৱেষণাৰ ওপৰত কাম কৰিছিল আৰু এই ফলাফল চৰ্চালৈ আহিছে। এই ফলাফলে বিজ্ঞানীসকলৰ চকু কপালত তুলিছে।

 খবৰ অনুসৰি, গৱেষণাৰ পৰা দেখা গৈছে যে মাতৃৰ শৰীৰত প্ৰৱেশ কৰাৰ পাছত এই বিষাক্ত কাৰ্বন কণাবোৰ প্লেচেন্টা আৰু তাৰ পাছত গৰ্ভত থকা শিশুটিকো আক্ৰমণৰ লক্ষ্য কৰি লৈ বিকাশশীল অংগবোৰত প্ৰৱেশ কৰে। এই অংগসমূহৰ ভিতৰত যকৃত, হাওঁফাওঁ আৰু মগজু আদি অন্তৰ্ভুক্ত। এই ফলাফলসমূহ অতি চিন্তনীয়, কিয়নো অংগসমূহৰ বিকাশৰ বাবে তৃতীয় ত্ৰৈমাসিক অতি গুৰুত্বপূৰ্ণ।

 বিশেষজ্ঞসকলৰ উদ্ধৃতিৰে প্ৰতিবেদনত কোৱা হৈছে যে বায়ুৰ গুণাগুণ নিয়ন্ত্ৰণত কাৰ্বন কণিকাৰ এই স্থানান্তৰৰ প্ৰতি লক্ষ্য ৰাখিব লাগে। আন এটা সংবাদ মাধ্যমৰ বাতৰি অনুসৰি পৰিৱেশ সুৰক্ষা সংস্থাৰ মতে জীৱাশ্ম ইন্ধন জ্বলোৱা গেছ আৰু ডিজেল ইঞ্জিন, কয়লাচালিত শক্তি কেন্দ্ৰ আদিৰ পৰা নিৰ্গত হোৱা ক’লা পদাৰ্থক ক’লা কাৰ্বন। ইয়াৰ এটা বৃহৎ অংশ কণাযুক্ত পদাৰ্থৰে গঠিত হৈ বায়ু প্ৰদূষণ কৰে।