গৰ্ভত সন্তান, হাতত তৰোৱাল! পেৰিছ অলিম্পিকত দেশৰ হৈ যুঁজ দিছে ইজিপ্তৰ নাডা হাফেজে

ডিজিটেল ডেস্কঃ ৰিঅ’, টকিঅ’ৰ পিছত পেৰিছ। যোৱা দুবাৰৰ দৰেই এই অলিম্পিকত মহিলাৰ ফেন্সিঙত ইজিপ্তক প্ৰতিনিধিত্ব কৰি নাডা হাফেজে অংশগ্ৰহণ কৰিছে। পেছাত তেওঁ এজন পেথ’লজিষ্ট। যোৱা দুবাৰৰ দৰে তেওঁ অকলে যুঁজ দিয়া নাছিল। পেৰিছত তেওঁৰ সংগী আছিল সাত মহীয়া শিশু।

পেৰিছৰ প্ৰথমখন মেচত নাডাৰ প্ৰতিদ্বন্দ্বী আছিল মহিলাৰ ফেন্সিং বিশ্ব ৰেংকিঙত দশম স্থানত থকা আমেৰিকান এলিজাবেথ টাৰ্টাকোভস্কি। নাডাই তেওঁক পৰাস্ত কৰি অলিম্পিক অভিযান আৰম্ভ কৰিছিল। ১৫-১৩ গ’লত জয়লাভ কৰি তেওঁ দৃষ্টি আকৰ্ষণ কৰে। লাষ্ট ১৬ত দক্ষিণ কোৰিয়াৰ হা ইয়ং জেওনৰ হাতত পৰাস্ত হয়। মেচখনত ৭-১৫ গ’লত পৰাস্ত হোৱাৰ পাছত নাডাই কয় যে তেওঁ সাত মাহৰ গৰ্ভৱতী হৈ অলিম্পিকলৈ আহিছিল। তেওঁৰ কথা শুনি সকলোৱে থতমত খালে।

এগৰাকী গৌৰৱান্বিত নাডাই কয়, ‘মোৰ ল’ৰা আৰু মই আমাৰ প্ৰতিদ্বন্দ্বীক প্ৰত্যাহ্বান জনাবলৈ সক্ষম হৈছো। শাৰীৰিক আৰু মানসিকভাৱে আমি যুঁজিব পাৰিলোঁ। ই গৌৰৱ। এই যুঁজখনে মোৰ সত্তা পূৰণ কৰিলে।''

গৰ্ভৱতী অৱস্থাত অলিম্পিক খেলিবলৈ অনুমতি দিয়াৰ বাবে নাডাই স্বামী ইব্ৰাহিম ইবাব আৰু পৰিয়ালৰ অন্যান্য সদস্যসকলক ধন্যবাদ জনায়। কায়ৰোৰ বাসিন্দাগৰাকীয়ে কয়, ‘গৰ্ভাৱস্থাৰ এই যাত্ৰা সহজ নহয়। জীৱন আৰু ক্ৰীড়াৰ মাজত ভাৰসাম্য ৰক্ষা কৰাটো মোৰ বাবেও সহজ সংগ্ৰাম নাছিল। গতিকে এই যুঁজখন মোৰ বাবে অতি মূল্যৱান। মোৰ স্বামী আৰু পৰিয়ালৰ আন সদস্যৰ সহায় অবিহনে মই ইমান দূৰলৈ আহিব নোৱাৰিলোঁহেঁতেন।’’

সাত মাহৰ গৰ্ভৱতী হৈ অলিম্পিকলৈ অহা নাদাক বিভিন্ন দেশৰ খেলুৱৈয়ে প্ৰশংসা কৰে। ক্ৰীড়াপ্ৰেমীসকলো প্ৰশংসাৰে ভৰি পৰে। ২৬ বছৰীয়া ফেন্সাৰগৰাকীয়ে ঘৰলৈ উভতি অহাৰ পিছত কিছুদিন খেলৰ পৰা আঁতৰি থাকিব বুলি কয়। সন্তান জন্ম দিয়াৰ পিছত সুস্থ হৈ পুনৰ দেশৰ বাবে যুঁজিব।