ডিজিটেল ডেস্কঃ ধৰ্ষণ আৰু ধাৰাবাহিক যৌন নিৰ্যাতনৰ অভিযোগত অভিযুক্ত হাছান সাংসদ প্ৰজ্জ্বল ৰেভান্নাই কংগ্ৰেছৰ শ্ৰেয়াছ পেটেলৰ হাতত পৰাজিত হ’ল ।পেটেলৰ হাতত ৪০ হাজাৰ ভোটত পৰাস্ত হয় প্ৰজ্জ্বল। ২৫ বছৰৰ পাছত হাছান লোকসভা সমষ্টিত কংগ্ৰেছ জয়ী হ’ল । যোৱা বছৰ বিধানসভাৰ নিৰ্বাচনত হোলেনাৰসীপুৰৰ পৰা প্ৰজ্জ্বলৰ পিতৃ এইচ ডি ৰেভান্নাৰ বিৰুদ্ধে যুঁজ দি পেটেল পৰাস্ত হৈছিল।প্রাক্তন প্রধানমন্ত্রী দেৱগৌড়াৰ নাতি তথা কর্নাটকৰ প্রাক্তন মুখ্যমন্ত্রী এইচ ডি কুমাৰস্বামীৰ ভতিজাক প্রজ্জ্বল ৰেভান্নাই সমষ্টিটোত ভোটদান হোৱাৰ এদিন পিছত, ২৭ এপ্ৰিলত জাৰ্মানীলৈ ৰাওনা হৈছিল ।
তেওঁৰ বিৰুদ্ধে উত্থাপিত অভিযোগৰ তদন্তৰ বাবে বিশেষ তদন্তকাৰী দল গঠন কৰা হৈছিল আৰু সাংসদগৰাকীৰ সন্ধান উলিওৱাত সহায়ক হোৱাকৈ ব্লু কৰ্ণাৰ জাননীও জাৰি কৰা হৈছিল। অৱশেষত বহু সতৰ্কবাণীৰ পিছত জেডিএছৰ নেতাগৰাকী ভাৰতলৈ উভতি আহি ৩১ মে’ৰ পুৱাৰ ভাগত গ্ৰেপ্তাৰ হৈছিল। উল্লেখ্য ২০১৯ চনৰ সাধাৰণ নিৰ্বাচনত প্ৰজ্জ্বলে হাছানৰ পৰা ১.৪ লাখৰো অধিক ব্যৱধানত জয়লাভ কৰিছিল।
Continue Reading
