ডিজিটেল ডেস্কঃ হাৰিয়ানাৰ নুহত সংঘটিত হৈছে এক ভয়ংকৰ দুৰ্ঘটনা । এখন যাত্ৰীবাহী বাছত জুই লগাৰ ফলত কমেও নজন লোকৰ মৃত্যু ঘটিছে। এই ঘটনাত আহত হৈছে ২৪গৰাকী যাত্ৰী । প্ৰশাসনে আশংকা কৰিছে যে হতাহতৰ সংখ্যা আৰু বৃদ্ধি পাব পাৰে। বাছখনত কেনেকৈ জুই লাগিল সেয়া এতিয়াও জানিব পৰা হোৱা নাই। আৰক্ষীয়ে ঘটনাটোৰ তদন্ত আৰম্ভ কৰিছে। বাছ খনত জুই লগাৰ সময়ত কমেও ৬০ গৰাকী লোক বাছ খনৰ ভিতৰত আছিল।
তেওঁলোকৰ বেছিভাগেই তীৰ্থযাত্ৰী বুলি জানিব পৰা গৈছে। মৃতসকলৰ ভিতৰত ছগৰাকী মহিলাও আছিল। ঘটনাটোৰ ফটো ছচিয়েল মিডিয়াত ভাইৰেল হৈ পৰিছে। ভিডিঅ'ত বাছখন এখন ফ্লাইঅভাৰত জ্বলি থকা দেখা গৈছে। বাছখনত থকা এগৰাকী মহিলাই সংবাদ মাধ্যমক কয় যে বাছখনৰ পিছফালে এখন বাইক আহি আছিল। বাইক আৰোহীজনেই প্ৰথমে জুই লক্ষ্য কৰিছিল। তেওঁ লগে লগে বাছ খন অতিক্ৰম কৰিছিল আৰু চালকজনক এই বিষয়ে অৱগত কৰিছিল। মহিলাগৰাকীয়ে কয় "মই বাছখনৰ সন্মুখৰ চিটত বহি আছিলো। যেতিয়া মই জুইৰ বিষয়ে শুনিছিলো, মই বাছৰ খিৰিকীৰে জঁপিয়াই দিছিলো। কেনেবাকৈ মই মোৰ জীৱন ৰক্ষা কৰিলোঁ।’’
পঞ্জাৱৰ বাসিন্দা মহিলাগৰাকীয়ে লগতে কয় যে বাছখনত তেওঁৰ কেইবাজনো আত্মীয় আছিল। তেওঁলোক সকলোৱে সাত-আঠ দিনৰ তীৰ্থযাত্ৰাৰ পিছত ঘৰলৈ উভতি আহিছিল। কিন্তু উভতি অহাৰ পথতে এই শোকাৱহ দুৰ্ঘটনাটো সংঘটিত হয়।
এজন প্ৰত্যক্ষদৰ্শীয়ে কয়, "বাছখন জ্বলি থকা দেখি স্থানীয় লোকসকল ঘটনাস্থলীলৈ দৌৰি গৈছিল। মানুহে জুই নুমুৱাবলৈ চেষ্টা কৰিছিল। কিন্তু কোনো লাভ নহ'ল। অগ্নি নিৰ্বাপক বাহিনীৰ চাৰিখন গাড়ী ঘটনাস্থলীক উপস্থিত হয় যদিও তেতিয়ালৈকে বাছখনৰ একো বাকী নাছিল।’’
Continue Reading
