ডিজিটেল ডেস্ক: সাৱধান! চাইবাৰ অপৰাধীৰ এইবাৰ চফ্ট টাৰ্গেট হৈছে গৰ্ভৱতী মহিলা আৰু প্ৰসূতিসকল। চৰকাৰী হাস্পতালত প্ৰসৱ হোৱা নৱজাতকৰ পৰিচৰ্যাৰ বাবে চৰকাৰী ধন দিয়াৰ প্ৰলোভনৰে বেংকৰ একাউণ্টৰ পৰা সৰকাই নিছে লাখ লাখ টকা। তেনে এক ঘটনা সংঘটিত হৈছে হাজোৰ চকামতলীত।
দুবছৰ পূৰ্বে গুৱাহাটী চিকিৎসা মহাবিদ্যালয় হাস্পতালত জন্ম হোৱা এটি শিশুৰ পিতৃ প্ৰকাশ মেধিক ৯২৮৮২ ৭২৯৯৭ নম্বৰৰ পৰা অজ্ঞাত লোকে ফোন কৰি চৰকাৰী ধন ৬০০০টকা দিয়াৰ প্ৰলোভন দিয়ে। ইয়াৰ পাছতেই গুগল পেৰ জৰিয়তে মোটা অংকৰ ধন লুটি নিয়ে চাইবাৰ অপৰাধীয়ে। চাইবাৰ অপৰাধীয়ে GMCHৰপৰা ফোন কৰা বুলি জনোৱাৰ লগতে গুগুল পেৰ জৰিয়তে ধন দিম বুলি কয়। অপৰাধী চক্ৰটোৱে প্ৰকাশ মেধিক এটা গুগুল পে থকা নম্বৰ বিচাৰে। ইয়াৰ পাছত প্ৰকাশ মেধিয়ে নিজ ভাতৃৰ গুগুল পেৰ তথ্য সদৰী কৰে অপৰাধী চক্ৰক।
প্ৰথমে ৫০,৫৩৮ টকা, তাৰপিছত ২০,১৯৩ টকা, ১৯,৪৭৯ টকা আৰু ৮,৪৬৫ টকা। মুঠ ৯৮,৬৭৫ টকা চাইবাৰ হেকাৰে অতি কৌশলেৰে সৰকাই নিয়ে। ঘটনা সন্দৰ্ভত ভুক্তভোগীয়ে হাজো আৰক্ষী থানাত দাখিল কৰিছে এজাহাৰ।
উল্লেখ্য যে বিগত কিছুদিনৰ ভিতৰত হাজোৰ বিভিন্ন অঞ্চলৰ গৰ্ভৱতী আৰু প্ৰসূতিসকলক চৰকাৰী আঁচনিৰ ধনৰ প্ৰলোভন দেখুৱাই চাইবাৰ অপৰাধীয়ে লুটি নিছে লাখ লাখ টকা।
Continue Reading
