ডিজিটেল ডেস্কঃ ভাৰতত প্রতি ঘণ্টাত পথ দুৰ্ঘটনাত ১৯ জন লোকৰ মৃত্যু হৈছিল ২০২২ বৰ্ষত। এই ১৯ জনৰ মাজত গড়ে ছজনে হেলমেট পৰিধান নকৰাকৈ দুচকীয়া বাহন চলোৱাৰ ফলত দুৰ্ঘটনাত প্ৰাণ হেৰুৱাইছিল। আনহাতে, মৃতকৰ মাজত গড়ে দুজন এনে লোকো আছে, যিসকলে বাহন চলোৱা বা যাত্ৰীৰ আসনত বহাৰ সময়ত ছিটবেল্ট পৰিধান কৰা নাছিল।
কেন্দ্ৰীয় পথ আৰু পৰিবহণ মন্ত্রণালয়ৰ প্ৰতিবেদনত এই তথ্য পোহৰলৈ আহিল। ২০২২ বৰ্ষত দেশত সংঘটিত পথ দুৰ্ঘটনাৰ সন্দৰ্ভত কেন্দ্ৰীয় চৰকাৰৰ পথ আৰু পৰিবহণ মন্ত্রণালয়ে মঙলবাৰে বাৰ্ষিক প্রতিবেদন প্রকাশ কৰিছিল। এই প্ৰতিবেদনত উল্লেখ কৰা অনুসৰি, ২০২২ বৰ্ষত দেশত মুঠ ৪,৬১,৩১২ টা পথ দুর্ঘটনা সংঘটিত হৈছিল আৰু এনে দুৰ্ঘটনাৰ ফলত ১,৬৮,৪৯১ জন লোকৰ মৃত্যু হৈছিল।
২০২১ বৰ্ষৰ তুলনাত ২০২২ বৰ্ষত দেশত দুৰ্ঘটনাৰ সংখ্যা ১১.৯ শতাংশ বৃদ্ধি পালে। কেন্দ্ৰীয় চৰকাৰৰ উক্ত প্রতিবেদনত উল্লেখ কৰা অনুসৰি, দুচকীয়া বাহন আৰু গাড়ী চলোৱাৰ সময়ত মূলত হেলমেট পৰিধান নকৰা আৰু ছিটবেল্ট লগোৱাৰ পৰা বিৰত থকাৰ ফলত দুৰ্ঘটনাত মৃতকৰ সংখ্যা দেশত বৃদ্ধি পাইছে। ২০২২ বৰ্ষত হেলমেট মুঠ পৰিধান নকৰাত দেশত ৫০,০২৯ জন আৰু ছিটবেল্ট ব্যৱহাৰ নকৰাৰ কাৰণত ১৬,৭১৫জন লোকৰ দুৰ্ঘটনাত মৃত্যু হৈছিল।
একেদৰে এক লাখৰো অধিক আৰোহী দুৰ্ঘটনাত আহত হৈছিল হেলমেট পৰিধান নকৰাৰ কাৰণত। ২০২২ত দেশত পথ দুৰ্ঘটনাত এক লাখ ৬৮ হেজাৰ লোকৰ মৃত্যু হৈছিল আৰু এইসকলৰ ৪৫ শতাংশই আছিল দুচকীয়া বাহনৰ চালক বা যাত্রী।
Continue Reading
