ডিজিটেল ডেস্কঃ হিজাব পৰিধানৰ বিষয়কলৈ এতিয়াও জ্বলি আছে ইৰান। ইৰানৰ এগৰাকী যুৱতী মাহচা আমিনীক ১৬ ছেপ্টেম্বৰত ইৰাণৰ নীতি আৰক্ষীয়ে হিজাব পৰিধান নকৰাৰ বাবে হত্যা কৰিছিল। সেই ঘটনাৰ পিছতে চৰকাৰৰ বিৰুদ্ধে বিৰুদ্ধে দেশ খনৰ জনতা জগি উঠিছিল। প্ৰতিবাদ দমন কৰিবলৈ ইৰনৰ চৰকাৰে কঠোৰৰ পৰা কঠোৰতম ব্যৱস্থা গ্ৰহণ কৰিছে। আৰক্ষীৰ গুলীত প্ৰায় ৩০০ প্ৰতিবাদকাৰী নিহত হৈছে।
ইয়াৰ মাজতে ইৰানৰ চৰকাৰে বহু প্ৰতিবাদকাৰীক মৃত্যুদণ্ড বিহা আৰম্ভ কৰিছে। দেশ খনত তিনি দিনৰ ভিতৰত দ্বিতীয়গৰাকী প্ৰতিবাদকাৰীক মৃত্যুদণ্ড বিহা হৈছে! ইৰাণৰ আয়াতুল্লাহ আলী খোমেনিৰ প্ৰশাসনে হিজাব বিদ্ৰোহ বন্ধ কৰিবলৈ এতিয়া মৃত্যুদণ্ড বিহা আৰম্ভ কৰিছে। ।চৰকাৰে প্ৰতিবাদকাৰীসকলক হত্যাৰ ভাবুকি দি সমগ্ৰ দেশতে 'মোল্লাতন্ত্ৰ' আৰু 'নীতি আৰক্ষী'ৰ বিৰুদ্ধে আন্দোলন কৰাসকলক দমন কৰিবলৈ চেষ্টা কৰি আছে।
ইৰাণৰ এখন আদালতে মাহচা আমিনীৰ মৃত্যুৰ বিৰুদ্ধে এক প্ৰতিবাদী সমদলত অংশ গ্ৰহণ কৰাৰ বাবে এজন লোকক মৃত্যুদণ্ড প্ৰদান কৰিছে। ব্যক্তিজনৰ নাম প্ৰকাশ কৰা হোৱা নাই। হিংসা আৰু ৰাজহুৱা সম্পত্তি ধ্বংসৰ অভিযোগত তেওঁৰ বিৰুদ্ধে এটা গোচৰ ৰুজু কৰা হৈছিল। ন্যায়াধীশে শুনানিৰ নামত এক ভাৰ্চুৱেল প্ৰহসনৰ পিছত অভিযুক্তজনক মৃত্যুদণ্ড বিহে। খবৰ পোৱা গৈছে যে অভিযুক্তৰ হৈ কোনো অধিবক্তা আদালতত নাছিল। গোটেই বিচাৰত কোনো সাক্ষী হাজিৰ কৰোৱা হোৱা নাছিল। বিচাৰকসকলৰ ওপৰত হেঁচা প্ৰয়োগ কৰি মৃত্যুদণ্ড দিবলৈ বাধ্য কৰা হৈছে।
তিনিদিন আগতে তেহৰাণৰ এখন আদালতে এজন প্ৰতিবাদকাৰীক "ঈশ্বৰৰ বিৰুদ্ধে অপৰাধ"ৰ বাবে দোষী সাব্যস্ত কৰিছিল। বিৰোধীজনক শাস্তি হিচাপে মৃত্যুদণ্ড দিয়া হৈছিল। ইৰাণৰ আন এখন আদালতে পাঁচজন প্ৰতিবাদকাৰীক ১০ বছৰৰ কাৰাদণ্ড প্ৰদান কৰিছিল। শেহতীয়াকৈ ২০ জন প্ৰতিবাদকাৰীৰ বিৰুদ্ধে গোচৰ ৰুজু কৰা হৈছে । তেওঁলোক দোষী সাব্যস্ত হ'লেই মৃত্যুদণ্ড প্ৰদান কৰা হ'ব।
মাহচা আমিনীক ১৬ ছেপ্টেম্বৰত ইৰাণৰ নীতি আৰক্ষীয়ে হত্যা কৰিছিল। তেতিয়াৰে পৰা সমগ্ৰ দেশতে প্ৰতিবাদ চলি আছে। আৰৱ বিশ্বৰ যুৱতীসকলে একনায়কত্ববাদৰ বিৰোধিতা কৰিবলৈ ইটালীৰ 'বেলা চাও' গানটো গাই ইৰাণৰ ৰাজপথত প্ৰতিবাদ কৰি আছে। হিজাব বিৰোধী আন্দোলনত দেশ খনৰ ছবি জগতকে ধৰি আন ক্ষেত্ৰৰ লোকো জড়িত হৈ পৰিছে। ইপিনে তেহৰানে দাবী কৰিছে যে আমেৰিকাৰ উচটনিতে এনে প্ৰতিবাদ হৈ আছে। লগতে দাবী কৰিছে যে এই আন্দোলনক ইৰাণৰ 'কোমলা' নামৰ এটা বামপন্থী সংগঠন আৰু কেইবাটাও উগ্ৰপন্থী গোটেও সমৰ্থন কৰিছে।
Continue Reading
