ডিজিটেল ডেস্কঃ এক শোকাৱহ দুৰ্ঘটনাই জোকাৰি গৈছে হিমাচল প্ৰদেশক। ৰাজ্য খনৰ কুল্লুত পাহাৰৰ পৰা খাৱৈত এখন বাছ বাগৰি পৰাত ৭ গৰাকী ছাত্ৰ-ছাত্ৰীৰ মৃত্যু ঘটে। ছাত্ৰ-ছাত্ৰীসকলক শিক্ষামূলক ভ্ৰমণৰ বাবে লৈ যোৱা বাছখনে নিয়ন্ত্ৰণ হেৰুৱাই খাৱৈত পৰি যায়। ঘটনাটোত কমেও ১০ জন লোক আহত হৈছে। আহত সকলৰ কেইজনমানৰ অৱস্থা সংকটজনক হুলি জানিব পৰা গৈছে।
আৰক্ষী সূত্ৰই প্ৰকাশ কৰা মতে কুল্লুৰ জলৰি পাছৰ ওচৰত এই দুৰ্ঘটনাটো সংঘটিত হয়। বাছ খনে দেওবাৰে নিশা প্ৰায় ৮:৩০ বজাত সেই ঠাইৰ মাজেৰে পাৰ হৈ থকাৰ সময়তে হঠাতে নিয়ন্ত্ৰণ হেৰুৱাই পাহাৰৰ ওপৰৰ পৰা তলৰ দ’ খাৱৈত পৰে।
খাদটোত পানী জমা হৈ আছিল। বাগৰি পৰা গাড়ীখনৰ কিছু অংশ পানীত ডুব যায়। দুৰ্ঘটনাটোৰ শব্দ শুনি স্থানীয় লোকসকল ঘটনাস্থলীলৈ ঢপলিয়ায় যায় আৰু উদ্ধাৰ অভিযান আৰম্ভ কৰে। অঞ্চলটোৰ লোকসকলে উদ্ধাৰ কাৰ্য্যত সহায় কৰি আছে বুলি আৰক্ষীয়ে জনাইছে। আৰক্ষী আৰু দুৰ্যোগ প্ৰশমন গোটে ঘটনাস্থলীত উপস্থিত হৈ ৭ টা মৃতদেহ উদ্ধাৰ কৰিছে। বাছ খনত মুঠ ১৭ জন যাত্ৰী আছিল।
নিহত আৰু আহত ছাত্ৰ-ছাত্ৰীসকলক এতিয়াও চিনাক্ত কৰিব পৰা হোৱা নাই। তেওঁলোকে বাৰাণসীৰ পৰা শিক্ষামূলক ভ্ৰমণৰ বাবে হিমাচললৈ গৈছিল। অৱশ্যে, শিক্ষাৰ্থীসকলৰ ঘৰৰ ঠিকনা এতিয়াও উদ্ধাৰ হোৱা নাই। পথৰ দুৰৱস্থাৰ বাবেই দুৰ্ঘটনাটো সংঘটিত হোৱা বুলি ধাৰণা কৰা হৈছে।
Continue Reading
