হিন্দী জাপি দিয়াটো কেন্দ্ৰৰ বৈষম্যমূলক সিদ্ধান্ত! প্ৰধানমন্ত্ৰীলৈ পত্ৰ প্ৰেৰণ কৰিলে এম কে ষ্টেলিনে

 ডিজিটেল ডেস্কঃ কেন্দ্ৰীয় চৰকাৰে হিন্দী ভাষা জাপি দিয়াৰ সম্পৰ্কত আপত্তি প্ৰদৰ্শন কৰিছে তামিল না়ডুৰ মুখ্যমন্ত্ৰী এম কে ষ্টেলিনে। দেওবাৰে প্ৰধানমন্ত্ৰী নৰেন্দ্ৰ মোদীলৈ প্ৰেৰণ কৰা এখনি পত্ৰত ষ্টেলিনে কয় যে দেশজুৰি হিন্দী ভাষা জাপি দিয়াটো কেন্দ্ৰীয় চৰকাৰৰ এটা বৈষম্যমূলক আৰু অবাস্তৱিক পদক্ষেপ। ষ্টেলিনে লিখে যে ইয়াৰ দ্বাৰা দেশৰ অ-হিন্দীভাষী লোকসকলক সমস্যাৰ সমুখলৈ ঠেলি নিব।

উল্লেখ্য যে এখন সংসদীয় সমিতিয়ে শেহতীয়াকৈ কৈছিল যে উচ্চশিক্ষাৰ অনুষ্ঠানসমূহৰ ভাষা হিন্দীভাষী ৰাজ্যসমূহত হিন্দী আৰু অনা-হিন্দীভাষী ৰাজ্যসমূহত স্থানীয় ভাষাত হোৱা উচিত। তদুপৰি ৰাষ্ট্ৰসংঘৰ কাৰ্যক্ৰমণিকাতো হিন্দী ভাষাই স্থান লাভ কৰা উচিত বুলি সমিতিখনে মন্তব্য কৰিছিল।

আনহাতে, দেশজুৰি হিন্দী ভাষা বলৱতক লৈ বাৰম্বাৰ আপত্তি প্ৰদৰ্শন কৰি আহিছে এম কে ষ্টেলিনে। ইয়াক কেন্দ্ৰীয় চৰকাৰৰ ‘ভাষা যুদ্ধ’ বুলি অভিহিত কৰি এনে কাম নকৰিবলৈ তেওঁ সকিয়নী প্ৰদৰ্শন কৰি আহিছে।

প্ৰধানমন্ত্ৰীলৈ প্ৰেৰণ কৰা পত্ৰখনতো তেওঁ এই বিষয়ে উনুকিয়াই দিয়ে। লিখে যে ভাৰতত হিন্দীভাষীতকৈ হিন্দী ভাষা নোকোৱা লোকৰ সংখ্যা সৰহ। সেয়ে স্থানীয় ভাষাসমূহক শ্ৰদ্ধা আৰু প্ৰশংসা জনাবলৈ তেওঁ প্ৰধানমন্ত্ৰীক অনুৰোধ কৰে।

আনহাতে, শনিবাৰে তামিলনাডুৰ শাসনাধীষ্ঠ ডিএমকেৰ যুৱ শাখাৰ সম্পাদক উদয়নিধি ষ্টেলিনে সকিয়নী প্ৰদৰ্শন কৰিছিল যে যদি কেন্দ্ৰৰ বিজেপিশাসিত চৰকাৰে তামিলনাডুত হিন্দী জাপি দিয়ে, তেন্তে দলটোৱে ব্যাপক হাৰত প্ৰতিবাদ সাব্যষ্ট কৰিব।