ডিজিটেল ডেস্কঃ হোলী উদ্যাপনৰ পাছত মুম্বাইৰ এটি গৃহত দম্পতীৰ মৃতদেহ উদ্ধাৰ। আৰক্ষীৰ পৰা আহি পৰা তথ্য অনুসৰি বুধবাৰে মুম্বাইৰ ঘাটকোপাৰ অঞ্চলত এটা বাসগৃহৰ বাথৰুমৰ ভিতৰত ৰহস্যজনক পৰিস্থিতিত এক দম্পতীক মৃত অৱস্থাত উদ্ধাৰ কৰা হয়৷জানিব পৰা তথ্য অনুসৰি দম্পতীহালে ঘাটকোপাৰ অঞ্চলৰ কুক্ৰেজা ভৱনত বাস কৰিছিল। আৰক্ষীয়ে প্ৰাথমিক তদন্ত আগবঢ়াইছে যদিও এতিয়ালৈকে মৃত্যুৰ কাৰণ জানিব পৰা হোৱা নাই।
দম্পতীহালৰ ঘৰত কামকৰা মহিলাগৰাকীয়ে প্ৰথম মৃতদেহ প্ৰত্যক্ষ কৰিছিল আৰু লগে লগে আত্মীয়সকলক মাতিছিল। ঘটনাস্থলী আত্মীয় স্বজন উপস্থিত হোৱাৰ পিছত মুম্বাই আৰক্ষী এই বিষয়ে অৱগত কৰে আৰু ঘটনাস্থলীত আৰক্ষী উপস্থিত হয়৷
জানিব পৰা তথ্য অনুসৰি দম্পতীহালে ভৱনটোৰ পঞ্চম মহলাত বাস কৰিছিল। আৰু মৃত দম্পতীহালৰ কিছু আত্মীয় ওচৰৰ অট্টালিকাত থাকে বুলি জানিব পৰা গৈছে।
মুম্বাইৰ জ’ন ৭ৰ আৰক্ষী আয়ুক্ত পুৰুষোত্তম কাৰাডে জনোৱা অনুসৰি "পন্ট নগৰ আৰক্ষীয়ে এই দুৰ্ঘটনাজনিত মৃত্যুৰ এটা গোচৰ ৰুজু কৰিছে, আৰু মৃতদেহ দুটা ইতিমধ্যে মৰণোত্তৰ পৰীক্ষাৰ বাবে প্ৰেৰণ কৰা হৈছে৷" উল্লেখযোগ্য যে মৃত হোৱা দম্পতীহালৰ স্বামীৰ বয়স ৪২ বছৰ আৰু পত্নীৰ বয়স ৩৯ বছৰ, গোচৰটোৰ অধিক তদন্ত চলাবৰ বাবে ইতিমধ্যে মুম্বাই আৰক্ষীয়ে নিজৰ প্ৰাথমিক তদন্ত আৰম্ভ কৰিছে আৰু দোষীক অতি শীঘ্ৰেই গ্ৰেপ্তাৰ কৰিব বুলি মুম্বাই আৰক্ষী আত্মবিশ্বাসী৷
Continue Reading
