ডিজিটেল ডেস্কঃ ১১৫ টকা খৰচ কৰি বন্ধুকেইজনে কণী কিনি খাইছিল। কিন্তু বিল কোনে পৰিশোধ কৰিব সেই লৈ চাৰিওজন বন্ধুৰ মাজত কাজিয়া আৰম্ভ হ’ল। সেই কাজিয়াৰ ফলতে তিনিজন কিশোৰে এজন পোন্ধৰ বছৰীয়া কিশোৰক হত্যা কৰিলে। উত্তৰ প্ৰদেশৰ মহাৰাজগঞ্জ জিলাৰ ঘুঘুলি গাঁৱত সংঘটিত হৈছে এই ঘটনা।
যোৱা বৃহস্পতিবাৰে সন্ধিয়া চাৰিজন বন্ধুৱে কণীৰ তৰকাৰী খাবলৈ স্থানীয় দোকান এখনত কণী কিনিবলৈ গৈছিল। কণী কিনাৰ পাছত বিক্ৰেতাই ১১৫ টকা দিবলৈ কয়। সেই টকা কোনে দিব সেই লৈ বিবাদ আৰম্ভ হ’ল। তৰ্ক চলি থকাৰ লগে লগে বাকী তিনি বন্ধুৱে চোকা অস্ত্ৰৰে চন্দন নামৰ কিশোৰ এজনৰ ওপৰত জপিয়াই পৰিল। হত্যা কৰাৰ পিছত চন্দনৰ মৃতদেহটো ওচৰৰ ছোটা গণ্ডক নদীত ভাঁহি উঠে।
পুত্ৰই নিশাও ঘৰলৈ উভতি নোযোৱা দেখি চন্দনৰ পৰিয়ালে থানাত খবৰ দিয়ে। শুকুৰবাৰে পুৱা স্থানীয় ৰাইজে চন্দনৰ মৃতদেহ নদীত ওপঙি থকা দেখিছিল। ইতিমধ্যে ঘটনাৰ তদন্ত কৰি চন্দনৰ তিনি বন্ধুক গ্ৰেপ্তাৰ কৰিছে আৰক্ষীয়ে। মৃত শিশুটিৰ পিতৃয়ে তিনিজন লোকৰ বিৰুদ্ধে থানাত এফআইআৰ দাখিল কৰে। কিশোৰজনৰ মৃতদেহ মৃত্যুৰ কাৰণ জানিবলৈ মৰণোত্তৰ পৰীক্ষাৰ বাবে প্ৰেৰণ কৰা হৈছে।
Continue Reading
