হোটলৰ OYO ৰুমত গোপন কেমেৰা ৰাখি আৰক্ষীৰ জালত পৰিল ৪ জন প্ৰৱঞ্চক! ক’ত?

ডিজিটেল ডেস্কঃ হোটলৰ OYO ৰুমত গোপন কেমেৰা ৰখাৰ অভিযোগত গ্ৰেপ্তাৰ হৈছে উত্তৰপ্ৰদেশৰ চাৰিজনকৈ লোক। নয়দাৰ গৌতম বুদ্ধ নগৰত গ্ৰেপ্তাৰ কৰা লোককেইজনে  OYO ৰুমসমূহত গোপনে কেমেৰা থৈ দম্পত্তিসকলক ব্লেকমেইল কৰি আহিছিল।

লোককেইজনৰ নাম ক্ৰমে বিষ্ণু সিং, আব্দুল ৱাহাৱ, পংকজ কুমাৰ আৰু অনুৰাগ কুমাৰ বুলি জানিব পৰা গৈছে। আৰক্ষীয়ে প্ৰকাশ কৰা মতে, লোককেইজনে OYO ৰুমত গোপন কেমেৰাৰে কৰা ৰেকৰ্ডিংসমূহ দেখুৱাই দম্পত্তিসমূহক ধন দাবী কৰি আহিছে।

আৰক্ষীয়ে জনোৱামতে, তেওঁলোকে গোপন কেমেৰাসমূহ হোটলৰ কোঠালিত থৈ দিয়ে আৰু দম্পত্তিসমূহৰ ব্যক্তিগত মুহূৰ্তসমূহ ৰেকৰ্ড কৰে। তাৰপাছত সেইসমূহ দম্পত্তিসমূহৰ সামাজিক মাধ্যম একাউণ্টত প্ৰেৰণ কৰি ধন দাবী কৰে।

তদুপৰি এটা অবৈধ কল চেণ্টাৰো তেওঁলোকে চলাই অহা বুলি জানিব পৰা গৈছে। কল চেণ্টাৰটোৰ জড়িয়তে অতি কম মূল্যতে আইফোন বিক্ৰী কৰা বুলি তেওঁলোকে জালিয়াতি কৰি আহিছে।

আৰক্ষীয়ে জনায় যে যোৱা দুইবছৰ ধৰি তেওঁলোকে এই কামত লিপ্ত হৈ আহিছে। ধাৰণা কৰা অনুসৰি, এইধৰণেই তেওঁলোকে কোটি কোটি টকা জালিয়াতি কৰিছে।

ইতিমধ্যে, নয়দা আৰক্ষীয়ে লোককেইজনৰ ওপৰত ভাৰতীয় দণ্ডবিধি ঘধাৰাৰ ৪২০, ৩৮৬, ৫০৬ ধাৰাৰ অধীনত এটা গোচৰ ৰুজু কৰিছে। তদুপৰি কেইবাটাও লেপটপ, মোবাইল আৰু ছিম কাৰ্ডো সংগ্ৰহ কৰিছে।