ডিজিটেল ডেস্ক: বিগত কেইবছৰমানত গুৱাহাটীৰ ট্ৰেফিক ছিগনেল আৰু পদপথত বৃদ্ধি পাইছে মগনীয়াৰ সংখ্যা৷ কেন্দ্ৰ আৰু ৰাজ্য চৰকাৰে দৰিদ্ৰতা হ্ৰাস কৰিবলৈ অহৰ্নিশে ব্যৱস্থা গ্ৰহণ কৰি থকাৰ সময়তে দৈনিক বৃদ্ধি পোৱা মগনীয়াৰ বৰ্ধিত সংখ্যাই অন্য বহু ঘটনা-পৰিঘটনাৰ ইংগিত বহন কৰিছে৷
শেহতীয়াকৈ গুৱাহাটীৰ ৰাজপথত হঠাতে বৃদ্ধি পাইছে মগনীয়াৰ সংখ্যা৷ এতিয়া গুৱাহাটীত প্ৰতিটো ট্ৰেফিক ছিগনেলতে দেখা যায় ৫ৰ পৰা ৬গৰাকীকৈ মগনীয়া৷ এই মগনীয়াসকলৰ বেছিভাগেই শিশু, মহিলা, বিশেষভাৱে সক্ষম ৬-৮ বছৰীয়া শিশু৷ অৱশ্যে ৰহস্যজনক কথাটো এয়ে যে ২-৩ বা ততোধিক ট্ৰেফিক আৰক্ষী কনিষ্টবল থকা সত্ত্বেও তেওঁলোকে মগনীয়াসকলক সেই স্থান ত্যাগ কৰিবলৈ বাধ্য নকৰে।
গুৱাহাটীৰ এই মগনীয়াসকলৰ বেছিভাগে হিন্দীভাষী৷ প্ৰায়ে তেওঁলোকে টকা-পইচা বিচাৰে, কেতিয়াবাহে খাদ্য বা কাপোৰ বিচাৰে।
এই মগনীয়াসকলৰ আঁৰত গুৱাহাটীত গঢ় লৈ উঠিছে নেকি বৃহৎ ছিণ্ডিকেট? এই সংশয় এতিয়া সচেতন মহলৰ৷ মগনীয়াক লৈ গুৱাহাটীত আৰম্ভ হৈছে নেকি ক’লা সাম্ৰাজ্য? ক’ৰ পৰা কেনেকৈ আহি গুৱাহাটীত বাহৰ পাতিছেহি এইসকল হিন্দীভাষী মগনীয়াই? এই বিষয়টো পুংখানুপুংখভাৱে অধ্যয়ন কৰি চৰকাৰে বিহিত ব্যৱস্থা গ্ৰহণ কৰাটো সময়ৰ আহ্বান হিচাপে বিবেচিত হৈছে৷
অসম ভিক্ষা প্ৰতিৰোধ আইন-১৯৬৪ এখন ৫৯ বছৰ পুৰণি আইন৷ ইমান পুৰণি আইন এখন কাৰ্যকৰী হৈ থকাৰ পাছতো গুৱাহাটীত মগনীয়াসকলক ৰখা আৰু পুনৰ্বাসিত কৰা কাৰ্য কাৰ্যকৰী হোৱা নাই। সাতটা বেচৰকাৰী সংগঠনৰ সৈতে এক অভিযান আৰু সহযোগিতা থকা সত্ত্বেও বহুতো মগনীয়া গুৱাহাটীত আছে। চৰকাৰে মগনীয়াসকলৰ ঘৰ স্থাপন কৰা, ভিক্ষা কৰা নিষিদ্ধ কৰা, ভিক্ষা বিৰোধী আইন কাৰ্যকৰী কৰা, আৰু পুনৰ্সংস্থাপন পৰিকল্পনা বিকশিত কৰা উচিত। উচ্চতম ন্যায়ালয়ে ২০২১ৰ ২৭ জুলাইত দিয়া নিৰ্দেশ অনুসৰি চৰকাৰে মগনীয়া পুনৰ্সংস্থাপন আঁচনিবোৰক সমাজ কল্যাণ আঁচনিৰ সৈতে সংযুক্ত কৰা উচিত।
Continue Reading
