ডিজিটেল ডেস্ক
পুনৰ ক’ভিড-১৯ ৰ আতংক আৰম্ভ হৈছে চীন দেশত৷ দৈনিক ক’ভিড-১৯ত আক্ৰান্তৰ সংখ্যা তিনিগুণলৈ বৃদ্ধিও পাইছে বুলি জানিব পৰা গৈছে৷ ক’ভিড আক্ৰান্তৰ হাৰ এনেদৰে বৃদ্ধি হোৱাৰ পিছতে চীনৰ চহৰসমূহত নতুনকৈ লকডাউন আৰু যাতায়ত-পৰিবহণত নিষেধাজ্ঞা জাৰি কৰা হৈছে।
চীনৰ ৰাষ্ট্ৰীয় সম্প্ৰচাৰক চি চি টিভিয়ে জানিবলৈ দিয়া মতে, উত্তৰ চীনৰ ছানছি প্ৰদেশৰ ফেনয়াং চহৰত সোমবাৰৰ পৰা লকডাউন আৰম্ভ হৈছে৷ চহৰজোৰা ক’ভিড পৰীক্ষাৰ অন্তত প্ৰশাসনে এই সিদ্ধান্ত গ্ৰহণ কৰিছে৷ লগতে যাতায়ত তথা পৰিবহণৰ ক্ষেত্ৰতো বাধা আৰোপ কৰা হৈছে৷
চীনৰ চৰকাৰৰ নিৰ্দেশনা অনুসৰি উদ্যান, কাৰ্যালয় ভৱন, দোকান আৰু অন্যান্য ৰাজহুৱা স্থানত প্ৰৱেশৰ বাবে ৭২ ঘণ্টাৰ ভিতৰত পৰীক্ষাৰ ফলাফল নিগেটিভৰ প্ৰয়োজন হয়।গতিকে ক’ভিড পৰীক্ষাৰ বাবে দৈনিক শাৰি পাতি থকাতো এতিয়া চীনৰ বাসিন্দাৰ বাবে অভ্যাসত পৰিণত হৈছে৷
ৰাষ্ট্ৰখনত ক‘ভিড সংক্ৰমণ বৃদ্ধি পোৱাটোৱে বহিঃৰাষ্ট্ৰৰ ক্ষেত্ৰতো প্ৰভাৱ পেলোৱাৰ সম্ভাৱনা আছে। পূৰ্বতেও ক’ভিডৰ বাবে নানা বিপৰ্যয়ৰ সন্মুখীন হৈছিল বহু দেশ৷ গতিকে অনাগত দিনত দেশখনে কেনেকৈ এই মহামাৰীক নিয়ন্ত্ৰণ কৰে সেইয়া লক্ষণীয় হ’ব৷
Continue Reading
