ইৰাণৰ হিজাববিৰোধী আন্দোলনঃ মোল্লা-মৌলবীৰ মূৰৰ পাগুৰি খোলা আৰম্ভ কৰিছে প্ৰতিবাদকাৰীয়ে

ডিজিটেল ডেস্কঃ এতিয়াও হিজাব বিৰোধী আন্দোলনত উত্তাল হৈ আছে ইৰান। মাচা আমিনিৰ মৃত্যুৰ পাছত এই আন্দোলনে তীব্ৰ ৰূপ ধাৰণ কৰিছে। শেহতীয়াকৈ সামাজিক মাধ্যমত এটা ভিডিঅ’ ভাইৰেল হৈ পৰিছে।

ভিডিঅ’টোত দেখা গৈছে এজন ইছলামিক ধৰ্মগুৰুৱে ৰাস্তাৰে খোজকাঢ়ি আহি থাকোতেই প্ৰতিবাদকাৰী এজনে অকস্মাৎ মূৰৰ পাগুৰি খুলি পেলাইছে। ইয়াৰ দ্বাৰা প্ৰতিবাদকাৰীজনে ইৰানৰ প্ৰশাসনৰ ওপৰত প্ৰতিকী প্ৰতিবাদ সাব্যষ্ট কৰিছে।

ধৰ্মগুৰুজনৰ পাগুৰি খোলাৰ পাছত স্বাভাৱিকভাৱেই প্ৰতিবাদকাৰীজন গুছি যায়। হতভম্ব হৈ পৰে ধৰ্মগুৰুজন।

উল্লেখ্য যে ১৬ ছেপ্টেম্বৰত হিজাব নিপিন্ধাৰ বাবেই মাছা আমিনিক আৰক্ষীয়ে মাৰ ধৰ কৰি হত্যা কৰাৰ অভিযোগ উত্থাপিত হৈ আহিছে। ৰাজপথলৈ উলাই আহে ইৰানৰ সচেতন নাৰীসকল।

তাৰপাছৰে পৰা দেশখনত হিজাব বিৰোধী আন্দোলনে তীব্ৰ ৰূপ ধাৰণ কৰি আছে। প্ৰশ্ন উঠিছে যে জনতাৰ এই জাগৰণৰ সমুখত ইৰানৰ মোল্লাতন্ত্ৰ বাচি থাকিবনে!