সুখবৰ! প্ৰথমবাৰৰ বাবে পৰীক্ষাগাৰত ৰোগীৰ বাবে প্ৰস্তুত কৰা হয় তেজ

ডিজিটেল ডেস্ক : বিশ্বৰ চিকিৎসা বিজ্ঞানত এক নতুন যুগৰ সূচনা কৰি বিজ্ঞানীসকলে পৰীক্ষাগাৰত ৰোগীৰ জীৱন ৰক্ষাৰ বাবে তেজ প্ৰস্তুত কৰি উলিয়ায়। বৰ্তমান পৰীক্ষাগাৰত প্ৰস্তুত কৰা এই তেজৰ প্ৰথম ক্লিনিকেল ট্ৰায়েল কৰা হৈছে।

 বিজ্ঞানীসকলৰ এই নতুন আৱিষ্কাৰে চিকিৎসা বিজ্ঞানক ন মাত্ৰা প্ৰদান কৰিব। ইতিমধ্যে বিজ্ঞানীসকলে প্ৰস্তুত কৰি উলিওৱা তেজ প্ৰথমবাৰৰ বাবে দুজন লোকক পৰীক্ষামূলকভাৱে দিয়া হৈছে। অৱশ্যে এইটোৱেই হৈছে পৰীক্ষাগাৰত প্ৰস্তুত কৰা তেজৰ প্ৰথমটো ক্লিনিকেল টেষ্ট।

 স্মৰ্তব্য যে বিজ্ঞানীসকলে ৰক্তদাতাৰ ষ্টেম চেল ব্যৱহাৰ কৰি লেবত এই তেজ তৈয়াৰ কৰিছিল। তেজ প্ৰস্তুত কৰাৰ পাছত প্ৰথম পৰীক্ষা হিচাপে দুজন স্বেচ্ছাসেৱকক মাত্ৰ ৫ৰ পৰা ১০ মিলিলিটাৰ তেজ দিয়া হৈছে। এই পৰীক্ষাৰ জৰিয়তে প্ৰস্তুত কৰা ৰক্তকণিকাসমূহৰ বিষয়ে তথ্য সংগ্ৰহ কৰা হয়। উল্লেখ্য যে প্ৰথমবাৰৰ বাবে পৰীক্ষাগাৰত প্ৰস্তুত কৰা তেজ মানুহৰ শৰীৰত দিয়া হয়।

 বিজ্ঞানীৰ দলটোৱে লগতে উল্লেখ কৰে যে তেজ দিয়া ৰোগী দুজনক নিৰীক্ষণ কৰি থকা হৈছে। এতিয়ালৈকে কোনো ধৰণৰ পাৰ্শ্বক্ৰিয়া দেখা পোৱা হোৱা নাই। দুয়োজন লোকে বৰ্তমান সম্পূৰ্ণ সুস্থ অৱস্থাত আছে।