ডিজিটেল ডেস্কঃ এক ভয়ংকৰ অগ্নিকাণ্ডই ইৰাণত ত্ৰাসৰ সৃষ্টি কৰিছে। দেশ খনৰ এটা পুনৰ্সংস্থাপন কেন্দ্ৰত ভয়ংকৰ অগ্নিকাণ্ড সংঘটিত হোৱাৰ খবৰ আহিছে। অগ্নিকাণ্ডত এতিয়ালৈকে কমেও ৩২ জন লোকৰ মৃত্যু ঘটিছে। কেইবাজনো লোক গুৰুতৰভাবে অগ্নিদগ্ধ হৈছে।
অৱশ্যে জুইলগাৰ প্ৰকৃত কাৰণ এতিয়াও জানিব পৰা হোৱা নাই। আৰক্ষীয়ে তদন্ত আৰম্ভ কৰিছে।স্থানীয় সংবাদ মাধ্যমৰ খবৰ অনুসৰি শুকুৰবাৰে উত্তৰ ইৰাণৰ গিলান প্ৰদেশৰ লাংগাৰাদ চহৰৰ পুনৰ্সংস্থাপন কেন্দ্ৰটোত ভয়ংকৰ অগ্নিকাণ্ডৰ ঘটনাটো ঘটে।
গিলান প্ৰদেশৰ উপ ৰাজ্যপাল মহম্মদ জালাই কয় "ঘটনাটোত ষোল্লজন লোক আহত হৈছে, যাৰ ভিতৰত চাৰিজনৰ অৱস্থা সংকটজনক," । গিলান প্ৰদেশৰ মুখ্য ন্যায়াধীশ ইছমাইল চাদেঘিয়ে কয় যে ঘটনাটোৰ তদন্ত আৰম্ভ কৰা হৈছে। পুনৰ্সংস্থাপন কেন্দ্ৰৰ পৰিচালককে ধৰি কেইবাজনো সন্দেহজনক লোকক ইতিমধ্যে গ্ৰেপ্তাৰ কৰা হৈছে।
স্থানীয় সংবাদ মাধ্যমৰ দ্বাৰা প্ৰকাশিত ভিডিঅ'সমূহত দেখা গৈছে যে কেন্দ্ৰটোত জুই লগাৰ ফলত ক'লা ধোঁৱাই সমগ্ৰ এলেকাটো আৱৰি ধৰে। ঘৰটোৰ চাল, দেৱাল আৰু খিৰিকী ক্ষতিগ্ৰস্ত হৈছে। উল্লেখ্য এই বছৰৰ আগষ্ট মাহত ইৰাণৰ ৰাজধানী তেহৰাণৰ এখন বজাৰত জুই লাগিছিল।
Continue Reading
